ރާއްޖޭގައި ހުރި އެމެރިކާގެ އެމްބަސީ ބަންދުކުރަން އެމެރިކާގެ ސަރުކާރުން ނިންމައިފިއެވެ.

މިއީ ޚަރަދު ކުޑަ ކުރުމަށް ކަމަށް ބުނެ، ޓްރަމްޕް އިދާރާއިން ދުނިޔޭގެ އެކި ކަންކޮޅުތަކުގައި ހުރި އެމެރިކާގެ 10 އެމްބަސީއަކާއި 17 ކޮންސިއުލޭޓެއް ބަންދުކުރުމަށް ނިންމި ނިންމުމުގެ ތެރެއިން އައި ކަމެއް ކަމަށް ސީއެންއެންއިން ހާމަކޮށްފައިވެއެވެ.

އަދި މި މަޝްރޫޢުގެ ދަށުން ރާއްޖޭގައި ހުރި އެމެރިކާގެ އެމްބަސީގެ މަސައްކަތްތައް ކައިރި ޤައުމެއްގައި ހުރި އެމްބަސީއަކަށް ބަދަލުކުރެވޭނެ ކަމަށް ބުނެފައިވެއެވެ.

ރާއްޖޭގައި އެމެރިކާ އެމްބަސީ ހިންގަމުން އަންނަނީ ހުޅުމާލޭގެ އިމާރާތަކުން ތަނެއް ކުއްޔަށް ހިފައިގެންނެވެ. އެ އެމްބަސީއަށް ހުޅުމާލެއިން މިހާރު ބިމެއް ވެސް ވަނީ ހަމަޖައްސައިފަ އެވެ. 

ރާއްޖޭގެ އެމްބަސީގެ އިތުރުން، ބަންދުކުރުމަށް ވިސްނަމުންދާ އަނެއް ނުވަ އެމްބަސީއަކީ އެރިޓްރިއާ، ގްރެނާޑާ، ލެސޯތޯ، ސެންޓްރަލް އެފްރިކަން ރިޕަބްލިކް، ލަގްޒެމްބާގް، ރިޕަބްލިކް އޮފް ދަ ކޮންގޯ، ގެމްބިއާ، ސައުތު ސޫދާން އަދި މޯލްޓާގައި ހުންނަ އެމްބަސީއެވެ.

މިއީ ސްޓޭޓް ޑިޕާޓްމަންޓްގެ ޚަރަދުތައް ގާތްގަނޑަކަށް 50 އިންސައްތަ ކުޑަކުރުމަށް އެ ޑިޕާޓްމަންޓްގެ އިސްވެރިން ހުށަހެޅި ހުށަހެޅުމާ ގުޅިގެން އައި ނިންމުމެއްކަމަށް ސީއެންއެންގައި ވެއެވެ. 

ނަމަވެސް، މި ނިންމުން ރިވިއުކުރުމަށް އެދެވިދާނެ ކަމަށާއި ނަމަވެސް ރުހުން ހޯދަން ކޮންގްރެސްއަށް ހުށަހެޅުމުގެ ކުރިން ފައިނަލް ވާޝަން ބަދަލުކުރެވޭނެ ކަމަށް ބެލެވޭ ކަމަށް އޮފިޝަލަކާ ހަވާލާދީ ސީއެންއެން ގައި ވެއެވެ. 

މި ނިންމުމާ ގުޅިގެން އެމެރިކާގެ ޤައުމީ ސަލާމަތަށް ނޭދެވޭ އަސަރުކޮށްފާނެ ކަމުގެ ކަންބޮޑުވުން ބައެއް ފަރާތްތަކުން ފާޅުކުރެވެމުންދެއެވެ. ޚާއްޞަކޮށް، ޗައިނާއަށް ވުރެ އެމެރިކާގެ ހާޒިރީ ބޮޑު ސަރަޙައްދުތަކުގައިވެސް އެމެރިކާގެ ނުފޫޒު ކުޑަވެގެން ހިނގައިދާނެ ކަމަށް އެފަރާތްތަކުން ބުނެއެވެ.

މި ނިންމުން ތަންފީޒުކުރެވިއްޖެނަމަ، ޔޫރަޕްގައި އެމެރިކާގެކާގެ ޑިޕްލޮމެޓިކް ހާޒިރީ ޗައިނާއަށް ވުރެ ކުޑަވެގެންދާނެއެވެ. އަދި އެފްރިކާ އަދި އިރުމަތީ އޭޝިއާގައި ޗައިނާގެ ނުފޫޒު އިތުރަށް ފުޅާވެގެންދާނެ ކަމަށް ލޯވީ އިންސްޓިޓިއުޓްގެ ދިރާސާތަކުން ދައްކައެވެ.