ސުޕްރީމް ކޯޓުގެ ދެ ފަނޑިޔާރުން ކަމަށްވާ މަހާޒު އަލީ ޒާހިރާއި ޑރ. އަޒްމިރަލްދާ ޒާހިރުގެ ސަސްޕެންޝަން އުވާލުމަށް އިދިކޮޅު އެމްޑީޕީން މިއަދު ގޮވާލައިފި އެވެ.

ރައްޔިތުންގެ މަޖިލީހުގެ ގޮނޑި ގެއްލޭ ހާލަތްތަކާ ގުޅޭ ދުސްތޫރީ މައްސަލައެއް ކުރިއަށް ގެންދަނިކޮށް ޖުޑީޝަލް ސާވިސް ކޮމިޝަން (ޖޭއެސްސީ)ން  މަހާޒާއި އަޒްމިރަލްދާއާއި ކުރީގެ ފަނޑިޔާރު ހުސްނުއްސުއޫދު ސަސްޕެންޑްކުރީ 26 ފެބްރުއަރީގަ އެވެ. ސަސްޕެންޑް ކޮށްފައުވަނިކޮށް ސުޢޫދު ވަނީ، މަގާމުން އިސްތިއުފާ ދެއްވާފައެވެ. 

މަހާޒާއި އަޒްމިރަލްދާ އަދިވެސް ސަސްޕެންޝަނުގައި ހުންނެވިއިރު، ފަނޑިޔާރުންގެ ބެންޗު ހަމަނުވާތީ ގޮނޑި ގެއްލޭ މައްސަލަ އޮތީ މަޑުޖެހިފައެވެ.

Advertisement

މި މައްސަލާގައި އެމްޑީޕީން މިއަދު ނެރުނު ނޫސްބަޔާނެއްގައި ވަނީ ސުޕްރީމް ކޯޓުގެ ދެ ފަނޑިޔާރަކު ސަސްޕެންޑްކުރިތާ ދެ މަސް ވާން ގާތްވެފައުވާ ކަން ފާހަގަކޮށް އޭގެ ސަބަބުން ސުޕްރީމް ކޯޓަށް ހުށަހެޅިފައިވާ ގިނަ ދުސްތޫރީ މައްސަލަތަކާއި ގައުމީ މައްސަލަތައް ހުއްޓިފައިވާތީ ކަންބޮޑުވުން ފާޅުކޮށްފައެވެ.

އެމްޑީޕީން ތުހުމަތު ކުރާގޮތުން، ސަރުކާރުން ވަނީ ސްޕްރީމް ކޯޓް ”ޕެރެލައިޒް“ ކޮށްލާފައެވެ. އަދި އެފަދައިން ކަންކުރީ، މެންބަރުންގެ ގޮނޑި ގެއްލޭ ގޮތަށް ގެނެސްފައިވާ އިސްލާހުގެ މައްސަލަ ސަރުކާރާއި ޕީއެންސީއާ ދެކޮޅަށް ނިމިދާނެ ކަމަށް ސަރުކާރަށް ކަށަވަރު ވުމުން ކަމަށްވެސް ތުހުމަތު ކޮށްފައިވެއެވެ.

"މިއީ ހަމައެކަނި ސުޕްރީމް ކޯޓުގެ ސިޔާސީ ކޮންޓްރޯލް ހޯދުމަށް ސަރުކާރުން ރާވައިގެން ކޮށްފައިވާ ކަމެއް ކަމަށް އެމްޑީޕީން ދެކެމެވެ. އަދި މިއީ އަދުލު އިންސާފުގެ ނިޒާމަށް އަމާޒުކޮށްފައިވާ ސީދާ ހަމަލާއެކެވެ،" އެމްޑީޕީގެ ނޫސްބަޔާނުގައިވެ އެވެ.

އެމްޑީޕީގެ ބަޔާނުގައި އިތުރަށް ބުނީ، މަހާޒާއި އަޒަމިރަލްދާގެ މައްޗަށް ކުރަނީ  ދޮގު ތުހުމަތުތަކެއް ކަމަށާ، 'ސަރުކާރުގެ ފުރިހަމަ ކޮންޓްރޯލް' އޮތް ޖޭއެސްސީން މައްސަލަ ބަލަނީ އިޖުރާއީ އިންސާފުވެރިކަމެއް ނެތި ކަމަށެވެ.

އަދި ފަނޑިޔާރުންނަށް ދިފާއު ވުމުގެ ހައްގު ނުދޭއިރު، އެ ފަނޑިޔާރުން ހުށަހަޅާ ހެކި ބަލައިނުގަނެ ވަކީލަށް ވެސް ފުރުސަތު ނުދޭކަން ކަމަށާ އެކަން ކުރަނީ ގާނޫނު އަސާސީންނާއި ބައިނަލްއަގުވާމީ މިންގަނޑުތަކުން ކަށަވަރުކޮށްދޭ އަސާސީ ހައްގުތަކާ ޚިލާފަށް ކަމަށް އެ ޕާޓީން ބުނެފައިވެއެވެ.

އެހެންކަމުން، ފަނޑިޔާރުންގެ ސަސްޕެންޝަން އުވާލައި، ފަނޑިޔާރުންނާ ދެކޮޅަށް ބަލަމުންދާ މައްސަލަތައް ބެލުން ހުއްޓާލުމަށް އެމްޑީޕީން ވަނީ ގޮވާލާފައެވެ.