ރައީސުލްޖުމްހޫރިއްޔާ ޑރ. މުހައްމަދު މުއިއްޒު, ޓިކްޓޮކްގެ އިސްވެރީންނާއި ބައްދަލު ކުރައްވާ މަޝްވަރާ ކުރައްވައިފި އެވެ.

މި ބައްދަލްވުން އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގަ އެވެ. އެ ބައްދަލްވުމުގެ ފޮޓޯތައް ހިއްސާކޮށް ރައީސް އޮފީހުން ބުނީ މި ބައްދަލްވުމުގައި އެއްބާރުލުން ދިނުމާއި ގުޅޭގޮތުން ފުޅާ ދާއިރާއެއްގައި މަޝްވަރާ ކޮށްފައިވާ ކަމަށެވެ.

މިއަދުގެ ބައްދަލްވުމުގައި ރާއްޖެ ޑިޖިޓައިޒްކުރުމަށް ރައީސް ގެންގުޅުއްވާ ތަސައްވުރު ވަނީ ހިއްސާ ކުރައްވާފަ އެވެ. އެ ތަސައްވުރަށް ތާއީދު ކުރާކަން ހާމަކޮށް ކުރިއަށްތާ ދެ ފަރާތުން ވެސް އެއްބާރުލުން ދިނުމާއި ގުޅޭގޮތުން އުންމީދީ ވާހަކަތަކެއް ދައްކާފައިވާ ކަމަށް ރައީސް އޮފީހުން ބުންޏެވެ.

Advertisement

ޓިކްޓޮކް އިން އާމްދަނީ ހޯދޭނެ މަގު ތަނަވަސް ކޮށް ދިނުމަށް ސަރުކާރުން ދަނީ މަސައްކަތް ކުރަމުންނެވެ. ޓިކްޓޮކް ޕްލެޓްފޯމަކީ ދުނިޔޭގެ އެކި ކަންކޮޅުތަކުގައި ގިނަ ބަޔަކު ބޮޑު އާމްދަނީ އެއް ހޯދަމުންދާ ވަސީލަތަކަށް ވަނީ ވެފަ އެވެ.

ރާއްޖޭގައި ވެސް އެންމެ މަޝްހޫރު ސޯޝަލް މީޑިއާ އެޕްލިކޭޝަނަކީ މިހާރު ޓިކްޓޮކެވެ. ނަމަވެސް ދިވެހީންގެ ގިނަ ބަޔަކު މި ޕްލެޓްފޯމް ބޭނުން ކުރާ ގޮތާމެދު ވަރަށް ގިނަ ބަޔަކު ފާޑުކިޔަ އެވެ.