ގެދޮރުވެރިޔާ ސްކީމުގެ ދަށުން ދޫކުރުމަށް ނިންމި 4،000 ފްލެޓް ލިސްޓަށް ޝަކުވާ ހުށަހެޅުމަށް ހުޅުވާލި މުއްދަތު ހަމަވިއިރު، 8،602 ޝަކުވާ ލިބިފައިވާކަމަށް ގެނދޮރުވެރިކަމާ ބިމާއި ޢުމްރާނީ ތަރައްޤީއާއި ބެހޭ ވުޒާރާއިން ބުނެފިއެވެ.

އެ ވުޒާރާއިން ވޮއިސްއަށް ހިއްސާކުރި މައުލޫމާތަށް ބަލާއިރު، ޝަކުވާ ހުށަހެޅުމަށް ހުޅުވާލި މުއްދަތުގައި ޕޯތަލްގެ އިތުރުން އީމެއިން އަދި ސިޓީ މެދުވެރިކޮށް ވަނީ ފްލެޓާ ގުޅޭގޮތުން ޝަކުވާ ހުށަހަޅާފައެވެ. މީގެ ތެރެއިން އެންމެ ގިނަ މީހުން ޝަކުވާ ހުށަހެޅީ ޕޯޓަލް މެދުވެރިކޮށެވެ. ޕޯޓަލް މެދުވެރިކޮށް 5،236 ޝަކުވާ ހުށަހެޅިއިރު، އީމެއިލް މެދުވެރިކޮށް 2،840 ޝަކުވާ އަދި ސިޓީ މެދުވެރިކޮށް 526 ޝަކުވާ ލިބުނުކަމަށް ހައުސިން މިނިސްޓްރީން ބުންޏެވެ. މައުލޫމާތު ލިބިފައިވާ ގޮތުގައި ފްލެޓްތަކާ ގުޅޭގޮތުން ޝަކުވާ ހުށަހެޅުމަށް ހުޅުވާލުމުން އެންމެ ގިނައިން ޝަކުވާ ލިބިފައިވަނީ 3 ކޮޓަރީގެ ފްލެޓާ ގުޅޭގޮތުންނެވެ

މިނިސްޓްރީން ބުނީ ޝަކުވާ ހުސަހެޅުމުގެ މުހުލަތު ހަމަވުމާއެކު ދެން އެންމެ އިސްކަމެއްދީގެން ކުރިއަށްދާނީ ހުށަހަޅާފައިވާ ޝަކުވާތައް ބަލައި ޖަވާބުދާރީވުމުގެ މަސައްކަތްކަމަށެވެ.

Advertisement

ގެދޮރުވެރިޔާ ސްކީމްގެ ދަށުން އެމްޑީޕީ ސަރުކާރުން އެކުލަވާލި ފްލެޓް ލިސްޓް މުރާޖައާ ކުރުމަށްފަހު އަދުގެ ސަރުކާރުން އެ ލިސްޓް އާއްމުކޮށްފައިވަނީ، މިއަހަރުގެ ފެބުރުއަރީމަހުގެ 27 ވަނަ ދުވަހުއެވެ. ފްލެޓް ލިސްޓަށް ޝަކުވާ ހުށަހެޅުމަށް ފުރުސަތު އެންމެ ފުރަތަމަ ހުޅުވާލާފައިވަނީ، ހުސްވި މާޗްމަހުގެ އެއްވަނަ ދުވަހެވެ. އޭގެފަހުން ދެވަނަ ފަހަރަށް ޝަކުވާ ހުށަހެޅުމުގެ މުއްދަތު އިތުރުކޮށްފައިވަނީ، އިއްޔެގެ ނިޔަލަށެވެ. 

ފްލެޓު ދޭން ކަނޑައަޅާފައިވާ 4000 މީހުންގެ ލިސްޓް ބެލުމުން ޝަރުތު ހަމަވީ 1،820 މީހުން ކަމަށް ސަރުކާރުން ވަނީ ބުނެފަ އެވެ.