އިދިކޮޅު މައި ޕާޓީ އެމްޑީޕީ އޮތީ އެކަތިގަނޑެއްގެ ގޮތުގަައި ބަދަހިކޮށް ކަމަށާ ޕާޓީގެ ވެރީންނާއި އެކްޓިވިސްޓުންނަށް ކުރާ ދައުވާތަކުން އަޑު ކަނޑުވައެއް ނުލެވޭނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުގެ ފަރާތްޕުޅުން، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އާއި އެ ޕާޓީގެ ޗެއަރޕާސަން ފައްޔާޒް އިސްމާޢީލް އަދި އެމްޑީޕީގެ އެކްޓިވިސްޓް މަރިޔަމް ޒުބައިރުގެ މައްޗަށް ހުށަހެޅި މައްސަލަތައް ކޯޓުގައި ރަޖިސްޓަރީ ކުރުމަށް އިޝާރާތް ކުރައްވަ އެވެ.
އެކްސްގައި ކުރެއްވި ޕޯސްޓްގައި އެމްޑީޕީގެ އެޑްވައިޒަރުގެ މަގާމުގައި މިވަގުތު ހުންނެވި ކުރީގެ ރައީސް ސޯލިހް ވިދާޅުވީ އެމްޑީޕީގެ ޗެއާޕާސަން ފައްޔާޒް އިސްމާއީލް އާއި ޕާޓީގެ ހިދުމަތްތެރީންގެ މައްޗަށް ސިޔާސީ ބޭނުމަށް އެކި ނަންނަމުގައި ކުރާ ދައުވާތަކަކީ އެމްޑީޕީގެ އަޑު ކަނޑުވާލުމުގެ މަގުސަދުގައި ހިންގާ ކަމެއް ކަމަށެވެ. އަދި އެއީ ފިނޑި އަމަލެއްގެ ގޮތުގައި ސިފަ ކުރެެއްވި އެވެ.
އެމަނިކުފާނު ވިދާޅުވި ގޮތުގައި މިއީ އެމްޑީޕީ އަށް އައު ކަމެއް ނޫނެވެ. އަދި އެފަދަ ކަމަކުން އެ ޕާޓީއާ އެ ޕާޓީގެ މެންބަރުން ކުޑަކޮށްވެސް ފަހަތަކަށް ނުޖެހޭނެ އެވެ.
"އަޅުގަނޑުމެން މިތިބީ އެކަތިގަނޑެއްގެ ގޮތުގައި، ބަދަހިކޮށް އަދި ރައްޔިތުންގެ ހައްގުގައި އެމްޑީޕީން ކުރާ މަސައްކަތްތައް ދާނީ ކުރިއަށް," ރައީސް ސޯލިހްގެ ޕޯސްޓްގައި ލިޔުއްވާފައިވެ އެވެ.
Advertisement
This content is created and paid for by advertisers and does not involve Voice Journalists
