އަންނަ މަހުގެ ތެރޭގައި، ޤުރުއާން ހިތުދަސްކުރުމުގެ މަޝްރޫޢުއެއް އަތޮޅު ތެރޭގެ ނުވަ ރަށެއްގައި ފެށިގެންދާނެ ކަމަށް އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

އެގޮތުން ވަޒީރު މިއަދު ވިދާޅުވިގޮތުގައި، މި މަޝްރޫޢު ކުރިއަށްދާނީ، އަތޮޅުތަކުގައި އިސްލާމީ މަރުކަޒު ޤާއިމުވެފައިވާ ތަންތަނާއި، މަރުކަޒުތައް ޤާއިމުކުރެވެމުންދާ ތަންތަނާއި ބޮޑެތި އާބާދީތަކުގައި ކަމަށެވެ.

ހއ. ދިއްދޫ،

ބ. އޭދަފުށި،

ދ. ކުޑަހުވަދޫ،

އއ. ފެރިދޫ،

ރ. އުނގުފާފު،

ހދ. ކުޅުދުއްފުށި،

ގދ ތިނަދޫ،

ސ. ހިތަދޫ.

ލ. ގަން.

މީގެ އިތުރުން ޤުރުއާން ކިޔަވައިދިނުމުގެ ދަތިތައް ހުރި ރަށްތަކާއި، ޤުރުއާން މަރުކަޒުގެ ގޮފިތައް އަހަރުތަކެއް ވަންދެން ހުއްޓިފައި ހުރި ރަށްތަކާއި، އަލަށް ޤުރުއާން ކިޔަވައިދިނުމާއި، މަރުކަޒްގެ ޤާރީ ކޯސްތައް ހިންގުމަށް ހަމަޖެހިފައިވާ ރަށްތަކުގައި، އަންނަ މަހުން ފެށިގެން ކީރިތި ޤުރުއާނާ ބެހޭ މަރުކަޒުން މުސާރަ ދޭ ގޮތައް މަރުކަޒުގެ ގޮފިތަކުގައި ޓީޗަރުން ހަމަޖެހިގެންދާނެ ކަމަށް ވަޒީރު ވިދާޅުވިއެވެ. 

އެގޮތުން، ރ. މަޑުއްވަރީ، ނ. ވެލިދޫ، ތ. ކިނބިދޫ، ތ. ގުރައިދޫ. ގދ. ގައްދޫ ، ލ. އިސްދޫ ކަލައިދޫ، ހއ. އުތީމު، ދ. މީދޫގައި ހުރި ޤުރުއާން މަރުކަޒުގެ ގޮފިތަކަށް، ޤުރުއާން މަރުކަޒުން ޤުރުއާން ޓީޗަރުން އަންނަ މަހުން ފެށިގެން ހަމަޖެހިގެންދާނެ ކަމަށް ވަޒީރު ވިދާޅުވިއެވެ. 

ހަމަ އެހެންމެ، ފުވައްމުލައް ސިޓީގެ ޤުރުއާން މަރުކަޒަށް، އެމަރުކަޒު ހިންގާނެ ކޯޑިނޭޓަރަކާއި އިދާރީ މުވައްޒަފުން ވެސް ހަމަޖެހިގެންދާނެ ކަން ވަނީ ހާމަކުރައްވާފައެވެ.