މިދިޔަ ހޯމަ ދުވަހު އަވަހާރަވި, ދިވެހި ބަހަށާއި ނޫސްވެރިކަމަށް ގިނަ ޚިދުމަތްތަކެއް ކޮށްދެއްވި ހިދުމަތްތެރިޔާ މަޑުލު މުހައްމަދު ވަހީދުގެ ހަނދާނުގައި ތައުޒިޔާގެ ދަފްތަރެއް ހުޅުވައިފި އެވެ.

މަޑުލު މުހައްމަދު ވަހީދުގެ ހަނދާނުގައި ތައުޒިޔާގެ ދަފްތަރު ހުޅުވައިދެއްވީ ދިވެހި ބަހުގެ މިނިސްޓަރު އާދަމް ނަސީރު އިބްރާހިމް އެވެ. އެ ދަފްތަރުގައި ސޮއިކުރުން މިއަދުވަނީ އެ މިނިސްޓްރީގައި ކުރިއަށް ގެންގޮސްފައެވެ.

އުމުރުން 77 އަހަރުފުޅުގައި މަޑުލު ވަހީދު އަވަހާރަވީ އާލާސްކަންފުޅަށް ފަރުވާ ހޯއްދަވަމުން ގެންދަވާތާ ދުވަސްތަކެއް ފަހުންނެވެ.

Advertisement

މަދަރުސީ ދައުރުން ފެށިގެން ވެސް ލިޔުންތެރިކަމުގެ ރޮނގުން ފާހަގަކޮށްލެވޭ މަޑުލު މުހައްމަދު ވަހީދަށް ދިވެހި އަދަބިއްޔާތުގެ ދާއިރާއިން، ދިވެހިބަހުގެ ލިޔުންތެރިކަން ކުރިއެރުވުމުގެ ރޮނގުން 2019 ޝަރަފުވެރިކަމުގެ ގައުމީ އިނާމު ވަނީ ލިބިވަޑައިގެންފައިވެއެވެ.

އިނގިރޭސިބަހުން ދިވެހިބަހަށް ގިނަ މުހިންމު ލިޔުންތަކެއް ތަރުޖަމާކޮށްދެއްވާފައިވާއިރު، އިޖްތިމާއީ މައްސަލަތަކާއި، މީހުންނަށް ދިމާވާ އާދަޔާ ހިލާފު ދަތި ހާލަތު ސިފަކޮށްދޭ ވަރަށް އަސަރުގަދަ ރީތި ކުރު ވާހަކަތަކަކީ މަޑުލު ވަހީދު ދިވެހިންގެ ތެރެއަށް ދޫކޮށްފައިވާ އަގުހުރި ޚިދުމަތެކެވެ.

މަޑުލު މުހައްމަދު ވަހީދަކީ ދައުލަތުގެ މީޑިއާ އެންމެ ފުރަތަމަ ޑިރެކްޓަރުންގެ ބޯޑުގެ ޗެއާމަން ވެސްމެ އެވެ. ހަމަ އެހެންމެ، ދިވެހިރާއްޖޭގެ އަޑުގެ އެހުންތެރިންނާއި ކިޔުންތެރިންނަށް 1973ވަނަ އަހަރުން ފެށިގެން މެދުނުކެނޑި 10 އަހަރުވަންދެން ބޭރު ދުނިޔޭގެ ހަބަރުތައް ގެނެސްދެއްވިއެވެ.

އެންމެފަހުން އަދާކުރެއްވީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރުކަމުގެ މަގާމެވެ.