ފުވައްމުލަކުގެ ކޮންސްޓްރަކްޝަން ސައިޓެއްގައި މަސައްކަތް ކުރަމުން ދިޔަ ޒުވާނަކު މިއަދު ވަނީ ކުއްލި ގޮތަކަށް ނިޔާވެފަ އެވެ. ކުއްލި ގޮތަކަށް ނިޔާވީ ރ. އަލިފުށީ، އަބަދަށްހިޔާގޭ ޢަބްދުالله ރިޝްދާން އެވެ. ރިޝްދާން ނިޔާވިއިރު އުމުރަކީ 27 އަހަރެވެ.
ރިޝްދާން އަކީ އައިޒަންމެންގާ ސިންޑޯރޯމް އަށް ޑައިގްނޯޒްގެ ފަރުވާ ހޯދަމުންދާ އައިމިނަތު އިރަމް އަހްމަދުގެ ފިރިމީހާ އެވެ. އިރަމްގެ ވާހަކަ އާންމުންގެ ސަމާލު ކަމަށް އައީ ޓީވީ މޯލްޑިވްސް އިން ގެނެސްދިން "އިހްސާސް" ޕްރަގްރާމް ގައި އޭނާގެ ވާހަކަ ގެނެސް ދިނުމުންނެވެ.
އޭނާ އެ ބައްޔަށް ޑައިގްނޯޒްވީ 2011 ވަނަ އަހަރު އެވެ. އޭގެ ފަހުން އެ ބައްޔަށް ފަރުވާ ހޯދުމުގައި އޭނާ ދަނީ ހިތްވަރާ އެކު ދުވަސްތައް ހޭދަކުރަމުންނެވެ. އެ ބަލީގައި އަހަރުތަކެއް ހޭދަކުރި ފަހުން ދިރިއުޅުން ރޫޅުނެވެ. ނަމަވެސް އިރަމްގެ ހަޔާތަށް ރިޝްދާން އައުން ވެގެން ދިޔައީ ދިިރިއުޅުމަށް ލިބުނު ބޮޑު ހަމަޖެހުމަކަށެވެ. އުފަލަކަށެވެ.
ރިޝްދާން ނިޔާވީ ކުއްލި ގޮތަަކަށް
މިއަދު މަސައްކަތު ސައިޓަށް ދިއުމާއި ހަމައަށް ވެސް ރިޝްދާންގެ ސިއްހީ މައްސަލައެއް ހުރިކަން ފާހަގަ އެއް ނުކުރެވެ އެވެ. މަސައްކަތުގައި އުޅެނިކޮށް ކުއްލި ގޮތަކަށް ވެއްޓުނީ އެވެ. އޭރު އެއްވެސް ހަބަރެއް ނެތެވެ.
ވަގުތުން ފުވައްމުލަކު ހޮސްޕިޓަލަށް ގެންދިޔަ އެވެ. ނަމަވެސް އޭރު ރިޝްދާން ވަނީ ނިޔާވެފަ އެވެ. ޑޮކްޓަރުންނާއި ހަވާލާދީ ފުލުހުން ބުނީ ހޮސްޕިޓަލަށް ގެންދިޔައިރު ވެސް ރިޝްދާން ނިޔާވެފައިވާ ކަމަށެވެ.
ރިޝްދާންގެ މޫނަށް ކޮންމެވެސް ވަރަކަށް އަނިޔާވެފައި ހުއްޓެވެ. ބެލެވެނީ އެއީ ވެއްޓުމުން ލިބުނު އަނިޔާތަކެއް ކަމަށެވެ. އެ ހާދިސާ ބަލަމުންދާ ކަމަށް ވެސް ބުންޏެވެ.
އިރަމްއަށް ވަރަށް އޯގާތެރި, ފެނުނީ ލޯބި ދެމަފިރިން
އިރަމްގެ ހަޔާތަށް ރިޝްދާން އައި ވާހަކަ އިއުލާނު ކުރުމަށް ފަހު ޓިކްޓިކް ގައި ދެ މީހުން ގެންދިޔައީ އެ މީހުންގެ ދިރިއުޅުމުގެ އެކި ވާހަކަތައް ހިއްސާ ކުރަމުންނެވެ. ކިތަންމެ ބޮޑު ބައްޔެއް ކުރިމަތިވެފައިވީނަމަވެސް ރިޝްދާންގެ އެހީތެރިކަން ލިބެން ފެށުމުން އިރަމްގެ ދިރިއުޅުން އުފާވެރިވި އެވެ.
އޭގެ ފަހުން ފަރުވާގެ ކަންކަން ކުރިއަށްދާ ގޮތުގެ މައުލޫމާތު ވެސް އެކި ވީޑިއޯތަކުގައި ދެ މީހުން ދިޔައީ ހިއްސާ ކުރަމުންނެވެ.
އެންމެ ފަހުން އާންމުކުރި އެއް ވީޑިއޯގައި އާމްދަނީ ލިބޭނެ ގޮތެއް ނެތުމުން ކަންބޮޑުވުން ފާޅުކުރި އެވެ.
ރިޝްދާންގެ ކުއްލި ވަކިވުމާ އެކު އިރަމްއަށް މި ލިބުނު ބޮޑު ހިތާމައާ ގުޅިގެން ވަރަށް ގިނަ ބަޔަކު ދަނީ ހިތާމަފާޅުކޮށް ތައުޒިޔާ ކިޔަމުންނެވެ.
Advertisement
This content is created and paid for by advertisers and does not involve Voice Journalists
