ސްޕްޝަލް އޮލިމްޕިކްސް މޯލްޑިވްސްގެ ދެވަނަ ދައުރުގެ ޗެއާޕާސަން ކަމަށް އިބްރާހީމް ރަމީޒް (އިބޭ) އިންތިހާބު ކޮށްފި އެވެ.

ޝީ ބިލްޑިން ރޭ އޮތް އިންތިހާބު އިބޭ ކާމިޔާބު ކުރީ ވޯޓުލީ އެންމެންގެ އިއްތިފާޤުންނެވެ.

ނިމިދިޔަ ދައުރުގައި އިބޭ އަދާކުރީ ޓެކްނިކަލް ޑިރެކްޓަރުގެ މަގާމެވެ.

ކުޑަކުދީންގެ މެދުގައި ވަރަށް މަގުބޫލު ޕްރެޒެންޓަރެއްް ކަމުގައިވާ އިބޭ އަކީ ނުކުޅެދުންތެރިކަން ހުންނަ ކުދީން / މީހުންގެ އެކި ކަންކަމުގައި ވަރަަށް އިސްކޮށް ހަރަކާތްތެރިވާ ބޭފުޅެކެވެ.

މީގެއިތުރުން ސެކްރެޓަރީ ޖެނެރަލް / ނެޝަނަލް ޑިރެކްޓަރުގެ މަގާމަށް ދެ ބޭފުޅަކު ވަނީ ވާދަކޮށްްފަ އެވެ. މަރްޔަމް އަބްދުއްރަޙީމް އަށް 20 ވޯޓު ލިބުނުއިރު ފާތިމަތު ފައިރޫޒާ އާދަމް އަށް 21 ވޯޓެވެ. އެމަގާމު މިހާރުވެސް އަދާކުރަނީ ފައިރޫޒާ އެވެ.

ކުރިއަށް އޮތް 4 އަހަރަށް އިންތިހާބުކުރި ހިންގާކޮމެޓީގެ ހަޒާންދާރުގެ މަގާމަށް 36 ވޯޓާއެކު، ހޮވިފައިވާނީ ސަފްވާން ޝަމީމް އެވެ. އައިޑީ އެކްސްޕާޓުގެ މަގާމަށް އިންތިހާބުވީ އަބްދުﷲ ޝާހް އެވެ. އޭނާ އަށް ވެސް ވަނީ 36 ވޯޓު ލިބިފަ އެވެ. މީގެއިތުރުން ފެމިލީ ރެޕްރެޒެންޓޭޓިވްއަކަށް 37 ވޯޓާއެކު ޝާދިޔާ އަބްދުލްޙަމީދު، އެތުލީޓް ރެޕްރެޒެންޓޭޓިވްއަކަށް 40 ވޯޓާއެކު އިބްރާހިމް ރަބީތު އަދި ޢާންމު މެންބަރުކަމުގެ މަގާމަށް 40 ވޯޓާއެކު އާމިނަތު ޝިޔާނާ އަދި 20 ވޯޓާއެކު މުހައްމަދު އަފްރާހް އެވެ. އާންމު މެންބަރުކަމަށް ވާދަކުރި އިހްސާނާ މުހައްމަދަށް ލިބިފައިވަނީ 19 ވޯޓެވެ.