މަސްޖިދުލްއަގްސާ ގޮއްވާލައި ބިމާ ހަމަކުރާނެކަމުގެ އިންޒާރު ޔަހޫދީ ހަރުކަށި ޖަމާއަތްތަކުން ދެމުންދާތީ އެކަމާ ފަލަސްތީނުގެ ފޮރިން މިނިސްޓްރީ އިން ކަންބޮޑުވުން ފާޅުކޮށްފިއެވެ. 

ޔަހޫދީ ހަރުކަށި ފަރާތްތަކުން ހިންގާ މަންސަ ތަކުގައި މަސްޖިދުލްއަގްސާ ތަޅާ ސުންނާފަތިކޮށް ޔަހޫދީ ފައްޅިއެއް އަޅާތަން ދައްކާ ވީޑީއޯއެއް ދަނީ ފަތުރަމުންނެވެ.

މިއީ އޭއައި ބޭނުންކޮށްގެން ހަދާފައިވާ ވީޑިއޯ އެއް ކަމަށް ވިޔަސް، ވީޑިއޯ ޝެއާ ކޮށްފައިވަނީ އިންޒާރަކާއި އެކުއެވެ. ވީޑިއޯގެ ކެޕްޝަނުގައި ޖަހާފައިވަނީ "ނެކްސްޓް އިޔާ އިން ޖަރޫސަލަމް" (މިއަންނަ އަހަރު ޖަރޫސަލަމްގައި) މިހެންނެވެ. 

Advertisement

މިކަމާ ކަންބޮޑުވުން ފާޅުކޮށް، ފަލަސްތީނުގެ ފޮރިން މިނިސްޓްރީން ވަނީ އިސްލާމީ ގައުމުތަކުގެ ސަމާލުކަމަށް މިކަން ގެނެސްފައެވެ.  

މަސްޖިދުލްއަގްސާ ސުންނާފަތި ކޮށްލުމަށް މީގެ ކުރިން ވެސް ޔަހޫދީން ވަނީ އެތައް ކަމެއް ކޮށްފައެވެ. މިހާރު ވެސް މަސްޖިދުލްއަގްސާގެ ހަރަމްފުޅު ވަށައިގެން އެމީހުންގެ ގަދީމީ ފައްޅިއެއް ހޯދުމުގެ ނަމުގައި ކޮންނަމުންދާ އަސްލު ބޭނުމަކީ މަސްޖިދުލްއަގްސާގެ ބިންގާ ލުހެލައި ހަލާކުކޮށްލުމެވެ. އަދި މީގެ 56 އަހަރު ކުރިން މަސްޖިދުލްއަގްސާ ރޯކޮށްލުމުގެ ނިޔަތުގައި މިސްކިތުގެ މިންބަރަށް ހުޅުޖެހިކަމަށް ވެސް ވެއެވެ.