އެމްޑީޕީގެ ރައީސް ޢަބްދުﷲ ޝާހިދު އިސްކޮށް ހުންނަވައި، އެޕާޓީގެ ވަފުދެއް އައްޑޫއަށް ފުރައިފިއެވެ.
މިއީ ޕާޓީގެ ލީޑަރޝިޕްގެ ފަރާތުން ޕާޓީގެ އާއްމު މެމްބަރުންނާއި ބައްދަލުކުރެއްވުމަށް އެކި ރަށްތަކަށް ކުރައްވަމުން ގެންދަވާ ދަތުރުތަކުގެ ތެރެއިން އައްޑޫ ސިޓީއަށް ކުރައްވާ ދަތުރެކެވެ.
ޝާހިދުގެ އަރިހުގައި އެމްޑީޕީގެ ޕާލަމެންޓްރީ ގްރޫޕްގެ ލީޑަރ އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް އާއި، މަރަދޫ ދާއިރާގެ މެމްބަރު އަހްމަދު ދީދީއާއި، އައްޑޫ ސިޓީގެ އެމްޑީޕީ ދާއިރާ ރައީސުން ބައިވެރިވެއެވެ. އަދި މީގެ އިތުރުންވެސް އެމްޑީޕީގެ ޤައުމީ މަޖިލީހުގެ އިތުރު ބައެއް މެމްބަރުންވެސް މިދަތުރުގައި އައްޑޫއަށް ވަޑައިގަންނަވައެވެ.
އައްޑުއަށް ފުރާވަޑައިގަތުމުގެ ކުރިން ޝާހިދު ވިދާޅުވީ، އައްޑޫއަކީ އެމްޑީޕީ އުފެއްދުމުގެ މަސައްކަތުގައިވެސް، އަދި އުފެދިގެން މިއަދާއި ހަމަޔަށްވެސް މެދުކެނޑުމެއް ނެތި އިސްލާޙީ ޙަރަކާތް އެންމެ ބާރަށް ހިނގާ އެއް ސަރަޙައްދުކަމަށެވެ. އަދި މި ދަތުރުގައި އައްޑޫގައި ތިބި ޕާޓީގެ މެމްބަރުންނާއި ބައްދަލުކޮށް، ޕާޓީގެ މަސައްކަތްތަކާއި ކުރިއަށް އޮތް އިންތިޚާބުތައް ޕާޓީއަށް ކާމިޔާބުކޮށްދިނުމާ ބެހޭ ގޮތުން މަޝްވަރާކުރައްވާނެކަމަށްވެސް ޝާހިދު ވިދާޅުވިއެވެ.
ޝާހިދު އިސްވެ ހުންނަވާ އައްޑޫއަށް މިއަދު ވަޑައިގަންނަވާއިރު، އެމްޑީޕީގެ ޗެއަރޕަރސަން ފައްޔާޒް އިސްމާއިލްއާއި ޕާޓީގެ ޕާލަމެންޓްރީ ގްރޫޕްގެ ބައެއް މެމްބަރުންނާއި ޤައުމީ މަޖިލީހުގެ ބައެއް މެމްބަރުން މިއަދު ހެނދުނު އުތުރުގެ ބައެއް ރަށްރަށަށް ކުރައްވާ ދަތުރުފުޅެއްގައި މިއަދު ހެނދުނު ވަނީ ފުރާވަޑައިގެންފައެވެ.
Advertisement
This content is created and paid for by advertisers and does not involve Voice Journalists
