ގައުމީ އެއާލައިން -- މޯލްޑިވިއަންގެ ސީޕްލޭން ޓާމިނަލް ޒަމާނީ ފެންވަރަށް ތަރައްގީކޮށް މިއަދު ހުޅުވައިފި އެވެ.

މިއަދު އޮތް ރަސްމިއްޔާތެއްގައި މޯލްޑިވިއަންގެ އައު ސީޕްލޭން ޓާމިނަލް ހުޅުވައިދެއްވީ ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން އެވެ.

މޯލްޑިވިއަން އިން ބުނީ މިއީ ފަސިންޖަރުންނަށް ފޯރުކޮށްދޭ ހިދުމަތްތައް ހަރުދަނާކޮށް އޮޕަރޭޝަނަލް އެފިޝަންސީ އިތުރުކުރުމަށް އެޅުނު މުހިންމު ފިޔަވަޅެއް ކަމަށެވެ. އަދި މިއީ ފަތުރުވެރިކަމާއި ވައިގެ ދަތުރުފަތުރު އިތުރަށް ފުޅާކުރުމަށް ޒަމާނީ ވަސީލަތްތަކާއެކު ގެނެވުނު ބޮޑު ބަދަލެއް ކަމަށެވެ.

އަދި މިއީ ފުރިހަމަ ހިދުމަތްތަކެއް ފޯރުކޮށްދިނުމަށާއި ރާއްޖޭގެ ރަށްތަކަށް ދަތުރުކުރާ ފަތުރުވެރީންނަށް ބައިނަލްއަގްވާމީ މަރުހަބާއެއް ކިޔުމަށް މޯލްޑިވިއަނުން ކުރަމުންދާ މަސައްކަތްތަކުގެ ހެއްކެއް ކަމަށް ވެސް ބުންޏެވެ.

މޯލްޑިވިއަން އިން ބުނީ އައު ޓާމިނަލްގައި ސީޕްލޭން ލައުންޖް ދެ ގުނަ ބޮޑުވާނެ ކަމަށެވެ. އަދި ކިޑްސް ޕްލޭ އޭރިއާ އަކާއި ލުއި ކާނާ އާއި ސްވެނިއާ ލިބޭނެ ކިއޮސްކެއްގެ އިތުރުން މުވައްޒިފުންނަށް ވަނީ ހާއްސަ ކެންޓީނެއް ގާއިމުކޮށްފައިވާ ކަމަށެވެ.

މީގެ އިތުުރުން އައު ޓާމިނަލްގައި ބޯޑިން ގޭޓްގެ އަދަދު އިތުރުކޮށްފައިވާއިރު ލައުންޖުގެ ބައެއްގެ ގޮތުގައި ދިވެހި މާހައުލާއި ގުޅޭގޮތަށް އައުޓް ޑޯ އޭރިއޭއެއް ވަނީ ގާއިމުކޮށްފަ އެވެ. އަދި މުޅި ޓާމިނަލްގެ އިންޓީރިއާ އަދި އެކްސްޓީރިއާއަށް ވަނީ ބަދަލު ގެނެސްފަ އެވެ.