މިދިޔަ ހަފުތާތެރޭ ހިމަބިއްސަށް ފައްސިވެފައިވަނީ 2 މީހުން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން މިއަދު ނެރުނު ރަސްމީ ތަފާސްހިސާބު ދައްކާގޮތުން މިދިޔަ ހަފުތާގައި ހިމަބިހި ޖެހުނު 2 މީހުންނާއެކު މި އަހަރުތެރޭ ހިމަބިހި ޖެހިފައިވާ މީހުންގެ އަދަދު މިހާރު ވަނީ 282 އަށް އަރާފައެވެ.
ހިމަބިހިން ރައްކާތެރިވުމަށް ޖަހާ ވެކްސިންގެ ޑޯޒްތައް ފުރިހަމަ ނުކުރާ މީހުންނަށް ވެކްސިން ޖަހައި ދިނުމުގެ މަސައްކަތް އެޗްޕީއޭއިން ކުރަމުންދާއިރު މި އަހަރުގެ މިހާތަނަށް 16،453 މީހުން ވަނީ ވެކްސިން ޖަހައިދީފައެވެ. އެޗްޕީއޭއިން ވަނީ، ހިމަބިހީގެ ވެކްސިންގެ ދެ ޑޯޒް ފުރިހަމަކޮށްފައިވާކަން ޔަގީންނުވާ މީހުން ވެކްސިން ދޭ މަރުކަޒުތަކަށް ޒިޔާރަތްކޮށް ވެކްސިން ފުރިހަމަ ކުރުމަށް އެދިފައެވެ.
ރާއްޖެއިން ހިމަބިހި ނައްތާލައިފައިވާ ގައުމެއްގެ ގޮތުގައި ކަނޑައަޅައިފައިވަނިކޮށް މި އަހަރުގެ މެއި މަހު ތެރޭގައި ހިމަބިހީގެ ކޭސްތައް ވަނީ ފެންނަން ފަށާފައެވެ. އެއާއެކު ހިމަބިހި ޖެހުން އިތުރުވެގެން ދިޔަނަމަވެސް، މިހާރު ހިމަބިއްސަށް ފައިސްވާ މީހުންގެ އަދަދު ވަނީ ވަރަށް ބޮޑަށް މަދުވެފައެވެ.
ހިމަބިހިއަކީ ގައިންގަޔަށް ފަސޭހައިން އަރާ ބައްޔެއް ކަމުން ވެކްސިން ފުރިހަމަ ނުކުރާ މީހުން ވެކްސިން ފުރިހަމަ ކުރުމަކީ ވަރަށް މުހިންމު ކަމެއްކަން އެޗްޕީއޭއިން ދަނީ ތަކުރާރުކޮށް ފާހަގަކުރަމުންނެވެ.
Advertisement
This content is created and paid for by advertisers and does not involve Voice Journalists
