ދެ ހޮސްޕިޓަލެއް ޓާޝަރީ ފެންވަރަށް ތަރައްޤީކުރަން ސަރުކާރުގެ ދެ ކުންފުންޏަކާ މިއަދު ހަވާލުކޮށްފި އެވެ.

ހެލްތު މިނިސްޓްރީގައި ބޭއްވި ރަސްމިއްޔާތުގައި ރ. އުނގޫފާރު ރީޖަނަލް ހޮސްޕިޓަލާއި ޅ. ނައިފަރު ހޮސްޕިޓަލް އަދި ގދ. ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލް ޑިޒައިން އެންޑް ބިލްޓު އުސޫލުން އަޅަން ހަވާލުކުރީ އާރުޑީސީ އަދި އެމްޓީސީސީއަށެވެ.

އެގޮތުން، އުނގޫފާރު ހޮސްޕިޓަލުގެ ހިދުމަތްތައް ޓާޝަރީ ފެންވަރަށް ބަދަލުކުރުމަށް އެމްޓީސީސީއާ ހަވާލުކުރީ 161،245،343ރ. އެވެ. އެ ކުންފުންޏާ އެ މަސައްކަތް ހަވާލުކުރެވުނީ، 17 މަސް ދުވަހުގެ ތެރޭގައި ނިންމާ ގޮތަށެވެ. 

އުނގޫފާރު ހޮސްޕިޓަލުގެ އިތުރުން، އަބްދުއްސަމަދު މެމޯރިއަލް ހޮސްޕިޓަލު ޓާޝަރީ ފެންވަރަށް ބަދަލުކުރަން ބޭނުންވާ ޖާގަ އިތުރުކުރުމަށްވެސް އެ ކުންފުންޏާ ވަނީ ހަވާލުކޮށްފައެވެ. އެ މަސައްކަތްވެސް 17 މަސް ދުވަހުގެ ތެރޭގައި ނިންމަން ހަވާލުކުރީ 147،437،643ރ. އަށެވެ.

މި އެއްބަސްވުން ތަކުގައި އެމްޓީސީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު އަހުމަދު ސައުދީ އވެެ. އަދި ހެލްތުގެ ފަރާތުން ސޮއި ކުރެއްވީ ސްޓޭޓް މިނިސްޓަރު އަހުމަދު ގާސިމެވެ.

މީގެ އިތުރުން، ނައިފަރުގައި ލޭބަރޫމް ކޮމްޕްލެކްސް އަދި އައިސީޔޫ ތަރައްގީކުރުމުގެ އާރުޑީސީއާ ހަވާލު ކޮށްފައިވާއިރު، އެ ކުންފުނީގެ ފަރާތުން  އެއްބަސްވުމުގައި ސޮއިކުރެއްވީ އާރުޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހު އަލީ ނަސީރެވެ. އަދި ހެލްތުގެ ފަރާތުން ސޮއި ކުރެއްވީ ސްޓޭޓް މިނިސްޓަރު އިސްމާއިލް ޝަރީފެވެ. 

7.7 މިލިއަން ރުފިޔާއަށް، އެ މަސައްކަތް ހަވާލުކުރެވުނީ އެއް އަހަރުގެ ތެރޭގައި ނިންމާ ގޮތަށެވެ.