ކ. ކާށިދޫ, ސިލްވާސީން, އުމުރުން 30 އަހަރުގެ ލަވްޒާ މުހައްމަދު މިއަދު އަޅުގަނޑުމެންނާއި ވަކިވެ ދިޔައީ އެވެ. ނަމަވެސް ލަވްޒާގެ ހަނދާންތަކާއި އޭނާގެ ގަދަ ހިތްވަރާއި މުހިންމު އެތައް މެސެޖުތަކެއް ދޫކޮށްފަ އެވެ. އޭނާގެ އާއިލާއާ ހެޔޮ އެދޭ އެކުވެރީންގެ ހިތްތަކުގައި އަބަދުގެ އަބަދަށް ހަނދާން ހުންނާނެ ގޮތެއްގަ އެވެ.
އެގޮތުން ލަވްޒާގެ އެކުވެރީން އެންމެ ބޮޑަށް ފާހަގަ ކުރަނީ މީގެ ދޮޅު އަހަރެއްހާ ދުވަސްކުރީން ފޭސްބުކުގައި އޭނާ ހިއްސާކުރި ޕޯސްޓެވެ. އެއީ މުޅި މުޖްތަމައުއަށް އޭނާ ދިން ވަރުގަދަ މެސެޖެކެވެ.
އިނގިރޭސިބަހުން ލިޔެފައިވާ އެ މެސެޖު ފަށާފައި ވަނީ ތެލެސީމިއާ މީހުންނާއި / ކުދީންނާއި ގުޅޭގޮތުން އެކި މީހުން ދައްކާ ތަފާތު ވާހަަކަތަކުންނެވެ. އެއީ ކޮންމެ ދުވަހަކު ލަވްޒާއާ ތެލެސީމިއާ ކުދީން އަޑުއަހާ ޖެހޭ ބަސްތަކެކެވެ.
ތެލެސީމިއާ ކުދީންނަށް ދިގު އުމުރެއް ނުލިބޭނެ ކަމަށް ބުނާ ބުނުމެވެ. "ބަލި" ބައެއްގެ ގޮތުގައި ސިފަ ކުރުމެވެ. އެއްވެސް ކަމެއް ނުކުރެވޭނޭ ބުނާ ބުނުމެވެ. ކާމިޔާބީގެ ބަދަލުގައި އަބަދުމެ އޮތީ ނާކާމިޔާބު ކަމަށް ބުނެ ދެރަ ކޮށްލަން ބުނެލާ ބަސްތަކެވެ.
ދިރިއުޅުމުގެ އެންމެ އުނދަގޫވި ވަގުތު ދޫކޮށްލި ގާތް މީހުންނާއި އެކުވެރީން ކަންތައް ކުރި ގޮތުގެ ވާހަކަ އެވެ.
ނަމަވެސް އެ ދުވަހު ލަވްޒާ ސާބިތުކޮށް ދިނީ ތެލެސީމިއާ އަކީ ބައްޔެއް ނޫން ކަމެވެ. އެއީ ލޭގެ އުނދަގޫ ކަމެއް ކަމެވެ. އެހެން މީހުންނާ ކޮންމެވެސް ތަފާތެއް ހުރި ނަމަވެސް ދިރިއުޅުމުގެ މައިދާނުގައި ކާމިޔާބު ހޯދި ދާނެ ކަމެވެ. ހިތްވަރާއެކު މަސައްކަތްކޮށް ތައުލީމް ހާސިލުކޮށް މަސައްކަތާއި ދިރިއުޅުމުގައި ކުރިއަށް ދެވިދާނެ ކަމެވެ.
ކ. ކާށިދޫ, ސިލްވާސީން, ލަވްޒާ މުހައްމަދު
އެކަން ލަވްޒާ ސާބިތުކޮށް ދިނެވެ. އެކަން ސާބިތުކޮށް ދިނުމަށް ފަހު ލަވްޒާ އެދުނީ ތެލެސީމިއާ ކުދީންނާއި މީހުންނަކީ އާދަޔާ ހިލާފު ބައެއް ނޫން ކަމުގައި ދެކުމެވެ. އެ މީހުންނަށް ތައުލީމާއި މަސައްކަތުގެ މާހައުލުގައި އަދި ދިރިއުޅުމުގައި އެހެން ކޮންމެ މީހެކޭ އެއްފަދައިން އަމަލު ކުރުމަށެވެ. ތަފާތު ނުކުރުމަށެވެ.
އެކުވެރީންގެ ދުލުން: އެއީ ހިތްވަރުގައި ނަމޫނާއެއް
ލަވްޒާގެ ކުއްލި ވަކިވުމާއެކު އާއިލާއާ އެކުވެރީންނަށް ލިބިފައިވަނީ ފުން ހިތާމަ އެކެވެ. ނަމަވެސް މިއީ ދުނިޔޭގެ ސުންނަތެވެ. ދުނިޔެއަށް އުފަންވި ކޮންމެ މީހަކަށް / އެއްޗަކަށް އުމުރެއް ވެ އެވެ. ކަނޑައެޅި ލިޔެވިފައިވާ އަޒަލެކެވެ.
އޭނާގެ ބައެއް އެކުވެރީން ފާހަގަ ކުރި ގޮުތުގައި އެއީ އެ މީހުންގެ ހަޔާތުގައި ބައްދަލްވި އެންމެ ހިތްވަރު ގަދަ އެކަކެވެ. އެއީ އޯގާތެރިކަމާއި ހިތްހެޔޮ ކަމުގައި ނަމޫނާ އެކެވެ. އެ މީހުންނަށް ދިމާވާ ކޮންމެ ކަމެއްގައި އެންމެ ގާތުވީ އެކުވެރި އަކީ އޭނާ އެވެ.
ވެވުނު މިންވަރަކުން އެހީތެރިވެ ދެ އެވެ. އަމިއްލަ ހާލަތަށް ބެލުމެއް ނެތި އެކުވެރީންގެ ކަންކަމަށް އަބަދުވެސް އިސްކަން ދިނެވެ. ގިނަ ވަގުތު ހޭދަކުރީ އެ މީހުންގެ އުފަލަށެވެ. އެ މީހުންނަށް އެހީތެރިވުމަށެވެ.
އެފަދަ ހެޔޮ އެކުވެރިއަކު ގެއްލުމަކީ ފޫބެދޭނެ ކަމެއް ނޫނެވެ. އެ މީހުންގެ ހެޔޮ ދުއާ އަބަދުވެސް ވާނެ އެވެ.
އެއާއެކު އެ އެކުވެރީން އަލުން ހަނދާންކޮށް ދިނީ ލަވްޒާގެ އަބަދުގެ މެސެޖެކެވެ. ތެލެސީމިއާ އާއިލާއާމެދު ދެކޭ ގޮތް ބަދަލު ކޮށް ދިނުމަށް އެދި އޭނާ މުޖްތަމައުއަށް ކުރި އިލްތިމާސެވެ. އެ ވަރުގަދަ އިލްތިމާސަށް މުޅި މުޖްތަމައު އިޖާބަދޭން ޖެހެ އެވެ.
Advertisement
This content is created and paid for by advertisers and does not involve Voice Journalists
