މާލޭގައި ހުރި އެންމެ ރީތި މިސްކިތަކީ ހެންވޭރުކޮޅުގައި ހުރި މަސްޖިދު މަލިކު ސަލްމާން ނުވަތަ ސަލްމާން މިސްކިތެވެ. އެއީ ސައުދީ ސަރުކާރުގެ ފަރާތުން ދިވެހީންނަށް ދިން އަގުބޮޑު ހަދިޔާ އެެކެވެ.
ވަރަށް ހިތްގައިމު ރީތި ޑިޒައިނަކަށް ހަދާފައިވާ އެ މިސްކިތަށް މިރޭ މަޣުރިބު ނަމާދާއި އިޝާ ނަމާދުގެ ޖަމާއަތަށް ވަރަށް ގިނަ ބަޔަކު ހާޒިރުވި އެވެ. މުޅި މިސްކިތް އޮތީ ފުރިފަ އެވެ.
އެއީ އާންމު ކަމެއް ނޫނަސް މިރޭ އެވަރުގެ ބޮޑު ޖަމާއަތެއް އެ ނަމާދުގައި އޮތީ މަސްޖިދުއްނަބަވީގެ އިމާމު ފަޟީލަތުއްޝައިޚް ޑރ. ޞަލާޙުލް ބުދައިރު އިމާމުވެ ނަމާދު ކުރައްވަން އޮތުމުންނެވެ.
ސަލްމާން މިސްކިތުގަައި ޝެއިހް ބުދައިރު އިމާމުވެ ނަމާދު ކުރެއްްވުން -- ފޮޓޯ: އިސްލާމިކް މިނިސްޓްރީ
އެމަނިކުފާނުގެ ފަހަތްޕުޅުގައި ނަމާދު ކުރަން ބޭނުންވާތީ އެވެ. ޝެއިހްގެ ހިތްގައިމު ކިޔެވުން އަަޑުއަހާލުމުގެ ބޮޑު ޝައުގުވެރި ކަމުގަ އެވެ.
މަޣުރިބުގެ ޖަމާއަަތް ނިމުމާއެކު އެތައް ބަޔަކު އަވަސްވެގަތީ ޝައިޚް ޑރ. ޞަލާޙުލް ބުދައިރުއާ ސަލާމް ކުރުމަށެވެ. ހިނދުކޮޅެއްގެ ތެރޭގައި މީހުންތައް ބޮނޑިވެ ޝެއިހް ވަށާލި އެވެ.
ސަލްމާން މިސްކިތުގަައި ޝެއިހް ބުދައިރު އިމާމުވެ ނަމާދު ކުރެއްްވުން -- ފޮޓޯ: އިސްލާމިކް މިނިސްޓްރީ
ދިގު ސަފެެއް ހެދި ހެދުނެވެ. ޝެއިހް ވަނީ އެމަނިކުފާނަށް ދިވެހީންގެ ހިތުގައި އޮތް ވަރުގަދަ ލޯބިފެނި އުފަލުން ހުރެ އެތައް ބަޔަކާ ސަލާމް ކޮށްފަ އެވެ. ބައެއް ކުޑަކުދީން އުރާލާ ގާތްކޮށްލެއްވި އެވެ.
ޝެއިހްގެ ފަރާތްޕުޅުން ވެސް ފެނުނީ ދިވެހީންނަށް އޮތް ހާއްސަކަމާ އިހްތިރާމެވެ. ލޯތްބެވެ. އާންމުންނާ ސަލާމް ކުރެއްވުމަށް ވަރަށް ގިނަ ވަގުތު ހޭދަ ކުރެއްވި އެވެ.
ސަލްމާން މިސްކިތުގަައި ޝެއިހް ބުދައިރު އިމާމުވެ ނަމާދު ކުރެއްްވުން -- ފޮޓޯ: އިސްލާމިކް މިނިސްޓްރީ
މަޣުރިބަަށް އައި ގިނަ މީހުން މިސްކިތުގައި މަޑުކުރީ އެވެ. އިޝާގެ ޖަމާއަތް ނިންމުމަށް ފަހު ދާށެވެ.
އެހެން ކަމުން އިޝާ ވަގުތު ޖެހުމުގެ މާކުރީން މިސްކިތް އޮތީ ފުރިފަ އެވެ. ފިރިހެނުންގެ އިތުރުން ވަރަށް ގިނަ އަންހެނުން ވެސް ދެ ނަމާދުގެ ޖަމާއަތަށް ހާޒިރުވި އެވެ.
ފަޟީލަތުއްޝައިޚް ޑރ. ޞަލާޙުލް ބުދައިރު މާދަމާ ރޭ މަޣުރިބު ނަމާދާއި އިޝާ ނަމާދު އިމާމުވެ ކުރަައްވާނީ އިސްލާމީ މަރުކަޒުގަ އެވެ.
ސަލްމާން މިސްކިތުގަައި ޝެއިހް ބުދައިރު އިމާމުވެ ނަމާދު ކުރެއްްވުން -- ފޮޓޯ: އިސްލާމިކް މިނިސްޓްރީ
މަސްޖިދުއްނަބަވީގެ އިމާމު ފަޟީލަތުއްޝައިޚް ޑރ. ޞަލާޙުލް ބުދައިރު މި ދަތުރުފުޅު މިނިސްޓަރު ޝަހީމްގެ މޭސްތިރި ކަމުގައި އިސްލާމިކް މިނިސްޓްރީން އިންތިޒާމު ކުރައްވާފައި ވަނީ ވަރަށް ފުރިހަމަ އަށެވެ. އެކަމަށް ތައުރީފު ހައްގެވެ.
ދީނީ އިލްމުވެރީންނާއި ހާއްސަ ބައްދަލްވުމެެއް އޮތެވެ. ކުޑަކުދީންނާ ވަކީން ބައްދަލްވުމެކެވެ. ޒުވާން ހަތީބުންނާއި ހާފިޒުންނާއި އިމާމުންނަށް ބައްދަލްވުމެކެވެ.
ބޮޑު ދެ މިސްކިތުން ޝެއިހްްގެ ރީތި އަޑުފުޅުން ކިޔަވާ އަޑުއިއްވާލެވޭ ގޮތަށް އިންތިޒާމު ކުރެއްވި އެވެ.
ހުރިހާ ކަމުން ފެނިގެން ދިޔައީ ފުރިހަމަ އިންތިޒާމެވެ. ރޭވުންތެރި ކަމެވެ. އެންމެންގެ ޝާމިލްވުން އޮންނަ ގޮތަށް ކަންކަން ކުރެއްވުމެވެ. ދިވެހީން މިފަދަ ކަންކަމަށް ދޭ ސަމާލުކަމާއި އަހަންމިއްޔަތެވެ. ބޮޑު ލޯތްބެވެ.
Advertisement
This content is created and paid for by advertisers and does not involve Voice Journalists
