ދަނޑުވެރިކަމުގެ ދާއިރާއިން އަންހެނުން ބާރުވެރިކުރުމަށާއި އެދާއިރާގައި އަންހެނުންގެ ބައިވެރިވުން އިތުރުކުރެވޭނެ ގޮތްތަކާއި ގުޅޭގޮތުން ޚާއްސަ މަޝްވަރާއެއް ބައްދަލުވުމެއް ބާއްވައިފިއެވެ.
މި މަޝްވަރާތަކަކީ، ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރިޔަމް މާރިއާ އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ޕާލޭ މޯލްޑިވްސްއާ ގުޅިގެން ބޭއްވި ބައްދަލުވުމެކެވެ.
އެބައްދަލުކުރެއްވުމުގައި ގްރީން ހައުސް ބޭނުން ކޮށްގެން ޒަމާނީ ވަސީލަތްތަކާއެކު، ދަނޑުވެރިކަން ކުރާނެ ގޮތްތަކާއި މާލީ އަދި އިދާރީގޮތުން އެކަން ކުރެވޭނެގޮތްތަކާ ގުޅޭގޮތުން މީހުން ތަމްރީނުކުރުމަށް އެބައްދަލުވުމުގައި މަޝްވަރާކުރެވުނުކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވެއެވެ. މި ބައްދަލުވުމުގެ މަޤްޞަދަކީ ހަމަ އެކަނި ދަނޑުވެރިކަން ކުރާނެގޮތުގެ އިތުރަށް ދަނޑުވެރިން ހައްދާ އެއްޗެހި ވިއްކުމަށް ހިންގާ ވިޔަފާރި ކުރިއެރުވުމަށް އެބޭފުޅުންނަށް ހޭލުންތެރިކަން އިތުރުކޮށްދިނުމެވެ.
މީގެ ކުރިންވެސް، ދަނޑުވެރިކަން ކުރިއެރުވުމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ގިނަ މަސައްކަތްތަކެއް ވަނީ ކުރައްވާފައެވެ. އަދި ދަނޑުވެރިކަމުގެ ސިނާއަތުގައި އުޅޭ އަންހެނުން އިތުރުކޮށް ބާރުވެރިކުރުވުމަށްޓަކައި ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާ ގުޅިގެން ދަނީ ބޮޑެތި މަސައްކަތްތަކެއް ކުރައްވަމުންނެވެ.
އެގޮތުން ދެމެހެއްޓެނިވި ދަނޑުވެރިކަމެއް ކުރެވޭނެ ގޮތަށް ޒަމާނީ ޓެކްނޮލޮޖީގެ ވަޞީލަތްތައް ބޭނުންކޮށްގެން އަންހެނުން އިސްވެ ފަށާ ވިޔަފާރިތަކަށް އެހީވުމަށް ޚާއްސަ ފަންޑެއް ޤާއިމުކުރުމަށް ނިންމާފައިވާކަމަށް ވަޒީރު ވަނީ ވިދާޅުވިއެވެ. އަދި މޫސުމީ ބަދަލުތަކަށް ވިލުންތެރި ދަނޑުވެރިކަމެއް ކުރުމާއި ދަނޑުވެރިކަމުގެ ވިޔަފާރިއާ ގުޅޭގޮތުން އަންހެނުން ތަމްރީންކުރަން ވަނީ ހަމަޖެހިފައެވެ.
މީގެ އިތުރުން، ދަނޑުވެރިކަން ކުރުމަށް ބޭނުންވާ ބިމާއި އެކިއެކި ވަޞީލަތްތައް އަންހެނުންނަށް ލިބޭނެ އިންތިޒާމެއް ހަމަޖައްސައި ފަސޭހަކަމާއެކު އަންހެނުންނަށް ދަނޑުވެރިކަން ކުރުމުގެ ފުރުސަތުތައް ފަހިކޮށްދޭނެ ގޮތްތައް ހޯދުމަށް އަންނަނީ މަސައްކަތް ކުރަމުންނެވެ.
Advertisement
This content is created and paid for by advertisers and does not involve Voice Journalists
