މަސްޖިދުއްނަބަވީގެ އިމާމު، ފަޟީލަތުއްޝައިޚް ޑރ. ޞަލާޙުލް ބުދައިރު ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ފުރާވަޑައިގަންނަވައިފި އެވެ.

ޝައިޚް ޑރ. ޞަލާޙުލް ބުދައިރު ފުރާވަޑައިގެންނެވީ މިއަދު ހަވީރު އެވެ. އެމަނިކުފާނަށް ވީއައިއޭ އިން އަލްވަދާއު ވިދާޅުވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެވެ.

މުޤައްދަސް ދެ މިސްކިތުގެ އިމާމުން ރާއްޖެ ވަޑައިގަންނަވާ ޕްރޮގްރާމެއްގެ ދަށުން މަސްޖިދުއްނަބަވީގެ އިމާމު، ފަޟީލަތުއްޝައިޚް ޑރ. ޞަލާޙުލް ބުދައިރު ރާއްޖެ ވަޑައިގެންނެވީ މި މަހުގެ 22 ވަނަ ދުވަހު އެވެ.

Advertisement

މަސްޖިދުއްނަބަވީގެ އިމާމު، ފަޟީލަތުއްޝައިޚް ޑރ. ޞަލާޙުލް ބުދައިރު ފުރާވަޑައިގެންނެވުން

އެމަނިކުފާނުގެ މި ދަތުރުފުޅުގައި ވަރަށް ގިނަ ބޭފުޅުންނާއި ބައްދަލު ކުރެއްވި އެވެ. ދީނީ ތަފާތު ހަރަކާތްތައް ބޭއްވެވި އެވެ.

އެ ގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ ބައްދަލު ކުރައްވާ މަޝްވަރާ ކުރެއްވި އެވެ. އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުއާ ބައްދަލު ކުރެއްވި އެވެ.

ރާއްޖޭގެ ވަރަށް ގިނަ ދީނީ އިލްމުވެރިންނާއެކު ޚާއްސަ ބައްދަލްވުމެއް ވަނީ ބާއްވަވާފަ އެވެ. އަދި ޕްރީސްކޫލް ދަރިވަރުންނާއެކު އިސްލާމީ މަރުކަޒުގައި މުހިންމު ހަރަކާތެއް ބޭއްވެވި އެވެ.

މަސްޖިދުއްނަބަވީގެ އިމާމު، ފަޟީލަތުއްޝައިޚް ޑރ. ޞަލާޙުލް ބުދައިރު ފުރާވަޑައިގެންނެވުން

މީގެ އިތުރުން ޒުވާން ޙާފިޡުންނާއި ޒުވާން ޚަޠީބުންނާއި އިމާމުން އަދި ޚަޠީބުންނާއި ބައްދަލު ކުރައްވާ އަގުހުރި ނަސޭހަތްތަކެއް ދެއްވި އެވެ.

ދެ ރެއަކު މަޣުރިބު ނަމާދާއި އިޝާ ނަމާދު އިމާމުވެ ކުރެއްވި އެވެ. އެއް ރޭ ސަލްމާން މިސްކިތުގަ އެވެ. އަނެއް ރޭ އިސްލާމީ މަރުކަޒު ގަ އެވެ. މީގެ އިތުރުން ރޭ އިސްލާމީ މަރުކަޒުގައި ވަރަށް ޚާއްސަ ދަރުހެއް ވަނީ ބާއްވާފަ އެވެ.

މިއަދު އިސްލާމީ މަރުކަޒުގައި އިމާމުވެ ހުކުރު ކުރެއްވީ ވެސް އެމަނިކުފާނެވެ. ވަރަށް އަސަރުގަދަ ރީތި ހުތުބާއެއް ދެއްވި އެވެ.

މިއީ މިދިޔަ 41 އަހަރުގެ ތެރޭގައި ދެ ހަރަމްފުޅުގެ އިމާމަކު ރާއްޖެ ވަޑައިގެންނެވި ފުރަތަމަ ފަަހަރެވެ.