ރާއްޖޭގައި ނުކުޅެދުންތެރިކަން ހުންނަ މީހުންގެ ގޮތުގައި 14،000 މީހުން ރަޖިސްޓްރީކޮށްފައި އެބަތިބިކަމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ހާމަކޮށްފިއެވެ.

މިދިޔަ ބްރާސްފަތިދުވަހު ބޭއްވި ރައްޔިތުން މަޖިލީހުގެ ޕެޓިޝަން ކޮމިޓީގައި އެންސްޕާގެ ބައެއް ކަންކަމާ ގުޅޭ މައުލޫމާތު ހިއްސާކުރައްވަމުން އެންސްޕާގެ ސީއީއޯ ހީނާ ވަލީދު ވިދާޅުވީ، ނުކުޅެދުންތެރިކަން ހުންނަ މީހުންގެ ގޮތުގައި މިހާތަނަށް 14،000 މީހަކު ރަޖިސްޓްރީކޮށްފައިވާކަމަށެވެ. 

ސަރުކާރުން ވަނީ ނުކުޅެދުންތެރިކަން ހުންނަ މީހުންގެ ޤައުމީ ދަފްތަރެއް 2023 ވަނަ އަހަރު އެކުލަވާލާފައެވެ. ދަފްތަރު އެކުލަވާލިފަހުން ދަފްތަރު އަދާހަމަކުރުމުގެ މަސައްކަތް މި ސަރުކާރުން ވަނީ މިދިޔަ އަހަރުގެ ތެރޭގައި ފަށާފައެވެ. ނުކުޅެދުންތެރިކަން ހުންނަ މީހުންގެ ދަފްތަރުގައި އެމީހެއްގެ ވަނަވަރު ވަރަށް ތަފްސީލީ ގޮތެއްގައި ހިމަނައެވެ. ސަރުކާރުން ބުނެފައިވަނީ ނުކުޅެދުންތެރިކަން ހުންނަ މީހުންގެ ދަފްތަރު އަދާހަމަކުރުމުގެ މަސައްކަތް ކުރަންޖެހުނީ ދައުލަތުން އެފަރާތްތަކަށް ދޭ ހިދުމަތްތައް އެންމެ އެކަށޭނެ ގޮތެއްގައި ފޯރުކޮށްދިނުމަށް ކަމަށެވެ. މިގޮތުން ދައުލަތުގެ ބަޖެޓުން އެފަރާތްތަކަށް ދޭ ފައިސާ އެންމެ ރަނގަޅު ގޮތުގައި އެންމެ ބޭނުންވާ މީހާއަށް ދިނުންވެސް މީގެ ތެރޭގައި ހިމެނެއެވެ.

އެންސްޕާގެ ސީއީއޯ ވިދާޅުވީ ނުކުޅެދުންތެރިކަން ހުންނަ މީހުންގެ އެލަވަންސްއަށް މިދިޔަ އަހަރު އެކަނިވެސް 560 މިލިއަނަށްވުރެ ގިނަ ރުފިޔާ ހޭދަކޮށްފައިވާކަމަށެވެ. ދައުލަތުގެ މިހިނގާ އަހަރުގެ ބަޖެޓަށް ބަލާއިރު، ނުކުޅެދުންތެރިކަން ހުންނަ މީހުންނަށް އެލަވަންސްގެ ގޮތުގައި 634.3 މިލިއަން ރުފިޔާ ދިނުމަށް ވަނީ ނިންމާފައެވެ. 

ނުކުޅެދުންތެރިކަން ހުންނަ މީހުންނަށް މީގެ ކުރިން 2000 ރުފިޔާގެ އެލަވަންސެއް ދެމުން އައިނަމަވެސް 2023 ވަނަ އަހަރު ސަރުކާރުން ވަނީ އެމީހުންނަށް ދޭ އެލަވަންސް ބޮޑުކޮށްފައެވެ. އެގޮތުން މިހާރު ނުކުޅެދުންތެރިކަން ހުންނަ މީހުންނަށް އެލަވަންސް ދެނީ، އެމީހެއްގެ ހާލަތަށާއި، ކުރަންޖެހޭ ހަރަދުތަކަށް ބެލުމަށްފަހުގައިކަން ފާހަގަކޮށްލެވެއެވެ. ސަރުކާރުން ނުކުޅެދުންތެރިކަން ހުންނަ މީހުންނަށްދޭ އެލަވަންސްއަށް ގެނައި ބަދަލާއެކު، މިހާރު އެންމެ މަދުން އެލަވަންސް ލިބޭ މީހާއަށް 3،000 ރުފިޔާ ލިބެއެވެ.