އަހަރުގެ މިހާތަނަށް ލޯނު އަނބުރާ ދެއްކުމަށް ދައުލަތުގެ ބައިތުލްމާލުން 2 ބިލިއަނަށްވުރެ ގިނަ ރުފިޔާ ހަރަދުކޮށްފައިވާކަމަށް ފިނޭންސް މިނިސްޓްރީން ބުނެފިއެވެ.

މާލީ ވުޒާރާއިން ހިއްސާކުރި މައުލޫމާތަށް ބަލާއިރު، މިމަހުގެ 17 ވަނަ ދުވަހުގެ ނިޔަލަށް އެ ވުޒާރާއިން ވަނީ ލޯނުތައް އަނބުރާ ދެއކްުމަށް 2.5 ބިލިއަން ރުފިޔާ ހޭދަކޮށްފައެވެ. މި ހިސާބުތަކަށް ބަލާއިރު ލޯނު އަނބުރާ ދެއްކުމަށް މިއަހަރުގެ ތެރޭގައި ސަރުކާރުން މިހާތަނަށް ކުރި ހޭދަވަނީ ނިމިގެންދިޔަ އަހަރުގެ މި މުއްދަތާ އަޅައިބަލާއިރު 175.9 އިންސައްތަ އިތުރުވެފައެވެ. 

ލޯނު ދެއްކުމަށް ހިނގި ހަރަދުތަކުގެ ތެރޭގައި މިއަހަރުގެ މާރިޗު މަހު ކާގިލް ފައިނޭންޝަލް ސާވިސަސްއަށް ދައުލަތުން ދައްކާފައިވާ 100 މިލިއަން އެމެރިކާ ޑޮލަރު ފާހަގަކޮށްލެވެއެވެ. އެ ލޯނު ނަގާފައިވަނީ ބަޖެޓް ސަޕޯޓުގެ ގޮތުގައެވެ. ލޯނު ނަގާފައިވަނީ، 7.15 އިންޓަރަސްޓް ރޭޓްގައި 3 އަހަރުދުވަހުގެ ތެރޭގައި އަގު އަދާކުރާގޮތަށެވެ. މި ސަރުކާރުން އެ ލޯނު ދައްކާ ނިންމާފައިވަނީ އިންޓަރެސްޓާއެކުކަމަށް މާލީ ވުޒާރާއިން ބުނެއެވެ.

މާލީ ވުޒާރާއިން ބުނާގޮތުގައި ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ.

އަންނަ އަހަރު ދައްކަންޖެހޭ 1 ބިލިއަން ޑޮލަރުގެ ތެރޭގައި ހިމެނެނީ 2021 ވަނަ އަހަރު ވިއްކާފައިވާ ސަވަރިން ސުކޫކަށް ދައްކަންޖެހޭ 500 މިލިއަން ޑޮލަރެވެ. 

ބޭރުގެ އިދާރާތަކަށް ދައްކަންޖެހޭ ލޯނުތައް އަދާކުރަންޖެހޭ މުހުލަތު ކައިރިވަމުން އަންނައިރު، އެންމެބޮޑު ކަންބޮޑުވުމަކީ ކުރީ ސަރުކާރުން ކުރު މުއްދަތެއްގެ ތެރޭގައި ބޮޑު އިންޓަރެސްޓަކާއެކު ލޯނުތައް ނަގާފައިވުންކަމަށް މާލީ ވުޒާރާއިން ވަނީ ބުނެފައެވެ.