ޣައްޒާއަށް އެހީގެ ގޮތުގައި ފޯރުކޮށްދީފައިވާ ކާބޯތަކެތި ހުސްވެއްޖެކަމަށް އދ ގެ ވަރލްޑް ފުޑް ޕްރޮގްރާމް (ޑަބްލިއުއެފްޕީ) އިން ބުނެފިއެވެ. 

ޑަބްލިއުއެފްޕީ އިން ބުނެފައިވަނީ ރައްކާކޮށްފައިހުރި ކާތަކެތި މިއަދު ވަނީ އެތަކެތި ފޯރުކޮށްދޭ ތަންތަނަށް ބަހައި ހުސްވެފައިކަމަށެވެ. މިގޮތުން އެތަންތަނުންވެސް ކުރިއަށްހުރި ދުވަސްތަކުގެ ތެރޭގައި ކާތަކެތި ހުސްވާނެކަމަށް އދ ގެ ކާނާއާ ބެހޭ ޖަމިއްޔާއިން ވަނީ ބުނެފައެވެ.

މިދިޔަ މާޗް މަހުން ފެށިގެން ޣައްޒާއަށް އެހީގެ އެއްވެސް ސާމާނެއް ވެއްދުން އިޒްރޭލުން ވަނީ ބަންދުކޮށްފައެވެ. ފަލަސްތީނުގެ ރައްރިތުންނަށް މިފަދައިން ދަތި ކުރުމަށް އިޒްރޭލުން ދެއްކި ބަހަނާއަކީ، އެއީ ހަމާސްއިން ރަހީނުންގެ ގޮތުގައި ހިފަހައްޓައިފައިވާ މީހުން ދޫކޮށްލުމަށް ޕްރެޝަރ ކުރުމުގެ ގޮތުން އެޅި ފިޔަވަޅެއްކަމަށެވެ. މިކަމާ ގުޅިގެން އދ އިން ވަނީ ބައިނަލްއަގުވާމީ ގާނޫނަށް ތަބާވުމަށް އިސްރާއީލަށް ގޮވާލާފައެވެ. އެހެންނަމަވެސް އިސްރާއީލުން ބުނެފައިވަނީ ފަލަސްތީނުގައި އެހީގެ ސަމާނަށް ދަތިނުވާ ކަމަށެވެ. 

އިސްރާއީލުން އެހެންނަމަވެސް ޣައްޒާގެ ރައްޔިތުން ބަނޑަށް ޖެހެމުންދާކަމަށް އދ ގެ އިތުރުން އެކިއެކި ބައިނަލްއަޤްވާމީ ޖަމިއްޔާތަކުންވެސް ވަނީ ބުނެފައެވެ. އދ އިން މައުލޫމާތުދީފައިވާ ގޮތުން ޣައްޒާގައި 1300 ކުޑަކުދިންގެ ތެރެއިން 80 އެކިއުޓް މަލްނިއުޓްރިޝަން ކޭސް ވަނީ ފެނިފައެވެ. މަލްނިއުޓްރިޝަންއަކީ ކާއެއްޗެހިން ހަށިގަނޑަށް ބޭނުންވާ ބައިތަށް ނުލިބުމުން ހަށިގަނޑުގައި އަށަގަންނަ ބައްޔެކެވެ. މީގެ އަސަރު އެންމެ ބޮޑަށް ފެންނާނީ ހެދިބޮޑުވެގެން އަންނަ ކުޑަކުދިންގެ ކިބައިންނެވެ.