އަހަރަކު އެއްފަހަރު، ޙަރަމްފުޅުގެ އިމާމެއް ރާއްޖެ ގެނައުމަށް މަސައްކަތް ކުރައްވާނެ ކަމަށް، އިސްލާމީ ކަންތައްތަކާބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އެމަނިކުފާނު ފޭސްބުކްގައި ކުރެއްވި ޕޯސްޓެއްގައި ވިދާޅުވީ މިކަމަކީ ޒުވާން ޖީލަށް ހިތްވަރު ދެއްވުމުގެ ގޮތުން ކުރައްވާ ކަމެއް ކަމަށެވެ. އަދި މިދިޔަ ހޯމަ ދުވަހު، މަސްޖިދުއް ނަބަވީގެ އިމާމް އަދި ޚަޠީބު، ފަޟީލަތުއްޝައިޚް ޑރ. ޞަލާޙުލް ބުދައިރު ރާއްޖެ ވަޑައިގަތުމުން ޒުވާން ޙާފިޡުންނަށާއި، އިމާމުންނަށާއި ޢިލްމުވެރީންނަށް، އަދި އެންމެހާ ދިވެހި ރައްޔިތުންނަށްވެސް އުފާވެރިކަން ލިބިގެންދިޔަ ކަމުގައި އެމަނިކުފާނުގެ ޕޯސްޓުގައިވެއެވެ.
ވަޒީރު ވިދާޅުވީ މިއަންނަ އަހަރު ރާއްޖެ ގެނެވޭތޯ މަސައްކަތް ކުރައްވަނީ މަސްޖިދުލް ޙަރާމްގެ އިމާމް އަދި ޚަޠީބު، ފަޟީލަތުއްޝައިޚް ޑރ. ޔާސިރު އައްދައުސަރީ ނުވަތަ މަސްޖިދުލް ޙަރާމްގެ އެހެން އިމާމެއް ކަމަށެވެ. ޑރ. ޔާސިރު އަކީ ދިވެހީންގެ ތެރޭގައި ވަރަށް މަޤުބޫލު، ގިނަ ބަޔަކު އެމަނިކުފާނުގެ ކިޔެވުމަށް ލޯބިކުރާ، ހިތްގައިމު އަޑެއްގެ ވެރިއެކެވެ.
މިކަންކަން ފަހިވެހެންދަނީ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިކަންކަމަށް ދެއްވަމުން ގެންދަވާ އެހީތެރިކަމާއި އެއްބާރުލުމުގެ ސަބަބުން ކަން ފާހަގަކުރައްވާ ވަޒީރު ވިދާޅުވީ، އެމަނިކުފާނު ވެރިކަމަށް ވަޑައިގަތީއްސުރެ ޒުވާނުންގެ ހިތްތަކުގައި ދީނީ ލޯބި އާލާކުރެއްވުމަށް ގިނަގުނަ މަސައްކަތްޕުޅުތަކެއް ކުރައްވަމުން ގެންދަވާކަމަށެވެ.
ޑރ. ބުދައިރު އިމާމްވެ ކުރެއްވި ނަމާދުތަކަށް މަސްޖިދު މަލިކި ސަލްމާން އަދި އިސްލާމީ މަރުކަޒު، އެކި އުމުފުރައިގެ މީހުން ބައިވެރިވެ ވަޑައިގެން އެ ނަމާދުތަކުގައި މިސްކިތްތައް ވަނީ ފުރިފައެވެ.
މީގެ އިތުރުން ޑރ. ބުދައިރުގެ ދަރުހަށްވެސް ވަރަށް ބޮޑު ތަރުހީބެއް ލިބުނުކަން ފާހަގަކުރެވެއެވެ. މި ދަރުހުގައި އެމަނިކުފާނުވަނީ، ކީރިތި ރަސޫލާގެ ވަރަށް އަގުހުރި ބާރަ ވަޞިއްޔަތެއް ހަނދާންކޮށްދެއްވާފައެވެ. ޑރ. ބުދައިރު ވަނީ އިއްޔެ މި ދަތުރުފުޅު ނިންމަވާލައްވާފައެވެ.
މިއީ ހަރަމްފުޅުގެ އިމާމަކު މިދިޔަ 41 އަހަރުގެ ތެރޭގައި ރާއްޖެ ކުރެއްވި ފުރަތަމަ ދަތުރުފުޅެވެ. މި ދަތުރުފުޅުގައި އެމަނިކުފާނު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ބައްދަލު ކުރައްވާފަ އެވެ. އަދި އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އާއި ރާއްޖޭގެ ޢިލްމުވެރީންނާއި ވެސް ބައްދަލު ކުރެއްވި އެވެ.
އަދި ޕްރީ ސްކޫލު ދަރިވަރުންނާއި ޒުވާން ޙާފިޡުންނާއި ޒުވާން ޚަޠީބުންނާއި އިމާމުން އަދި ޚަޠީބުންނާއި ވެސް ބައްދަލު ކުރެއްވި އެވެ.
Advertisement
This content is created and paid for by advertisers and does not involve Voice Journalists
