ކަންކަމާ ޒިންމާ ނަގަން ނުވަތަ އިތުރަށް މައްސަލަ އިތުރަށް ހޫނުވިޔަ ނުދިނުމަށް އިސްތިއުފާ ދިނުމަކީ އެންމެ ރިވެތި ގޮތް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެކްސްގައި މިރޭ ކުރެއްވި ޕޯސްޓެއްގަ އެވެ.

މިފަދަ ޕޯސްޓެއް ކުރެއްވީ ކޮމިޝަނަރު އޮފް ޕޮލިސްގެ މަގާމުން އަލީ ޝުޖާއު މިރޭ އިސްތިއުފާ ދެއްވުމާއި ގުޅިގެންނެވެ. ޝުޖާއު އިސްތިއުފާ ދެއްވީ ގެއެއްގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުޅިގެން ފުލުހުން ހިންގާ ތަހުގީގަށް ވަރަށް ބޮޑަށް ފާޑުކިޔުން އަމާޒުވެފައި ވަނިކޮށެވެ.

ނަޝީދު ވިދާޅުވީ ކަންކަމާ ޒިންމާ ނަގަން ނުވަތަ އިތުރަށް މައްސަލަ އިތުރަށް ހޫނުވިޔަ ނުދިނުމަށް އިސްތިއުފާ ދިނުމަކީ އެންމެ ރިވެތި ޑިކޮމްރެޓިކް އުސޫލު ކަމަށެވެ.

“އަބަދުވެސް އިސްކަން ދޭން ޖެހޭނީ ރާއްޖޭގެ ރައްޔިތުންގެ ހެވާއި ލާބަށް. ޕޮލިސް ކޮމިޝަނަރު އަލީ ޝުޖާއު އަށް މަރުހަބާ،” ނަޝީދުގެ ޕޯސްޓްގައި ވިދާޅުވި އެވެ.

ޝުޖާއުގެ އިސްތިއުފާ ރައީސް މުއިއްޒު ވަނީ ގަބޫލު ކުރައްވާފަ އެވެ. އެއާއެކު ފުލުސް ހިންގުން ވަނީ ޑެޕިއުޓީ ކަމިޝަނަރު އިސްމާއިލް ނަވީންއާ ވަނީ ހަވާލު ކުރައްވާފަ އެވެ. ނަމަވެސް ފުރަތަމަ އެ ޒިންމާ ހަވާލު ކުރެއްވީ އެމަގާމަށް ޑެޕިއުޓީ ކޮމިޝަނަރަކަށް ހުންނެވި ފަރުހާދު ފިކުރީއާ އެވެ.

އެ ބަދަލު ގެނައީ ގަޑިއިރެއްގެ ތެރޭގަ އެވެ.

ކަންކަމާ ޒިންމާ ނަގަން ނުވަތަ އިތުރަށް މައްސަލަ އިތުރަށް ހޫނުވިޔަ ނުދިނުމަށް އިސްތިއުފާ ދިނުމަކީ އެންމެ ރިވެތި ގޮތް ކަމަށް ކުރީގެ ރައީސް މުހައްމަދު ނަޝީދު ވިދާޅުވިއިރު އެމަނިިކުފާނަކީ ވަރަށް ގިނަ މަގާމުތަކުން އިސްތިއުފާ ދެއްވި ބޭފުޅެކެވެ.

ވަރަށް ގިނަ ބައެއްގެ ލޯތްބާއި ތާއީދު އޮތް ރައީސް ނަޝީދު ފުރަތަމަ އިސްތިއުފާ ދެއްވީ ރައީސުލްޖުމްހޫރިއްޔާގެ މަގާމުންނެވެ. އެއީ ފެބްރުއަރީ 7، 2012 ގަ އެވެ.

އޭގެ ފަހުން އެމްޑީޕީގެ ރައީސްގެ މަގާމުން އިސްތިއުފާ ދެއްވި އެވެ. އަދި ރައްޔިތުންގެ މަޖިލީހުގެ ރައީސްގެ މަގާމުން ވެސް އެމަނިކުފާނު އިސްތިއުފާ ދެއްވި އެވެ.

ކޮންމެ ފަހަރަކު ވެސް އެމަނިކުފާނު އިސްތިއުފާ ދެއްވަނީ ދާދި އެއްގޮތް އިބާރާތްތަކެއް ބޭނުން ކުރައްވައިގެންނެވެ. އެއީ ގައުމާއި ރައްޔިތުންގެ ހައްގުގައި އަދި ހަމަޖެހުމަށް އިސްކަން ދެއްވުމުގެ ގޮތުންނެވެ.