ޕާޓީ ޑްރަގާއި މަސްތުވާތަކެތި ބޭނުންކުރުން އިތުރުވުމާއި ގުޅިގެން ނޭޝަނަލް ޑްރަގް އޭޖެންސީ (އެންޑީއޭ) އިން ހާއްސަ ހަރަކަތްތަކެއް ކުރިއަށް ގެންދާ ކަމަށް އެ އޭޖެންސީއިން ބުނެފިއެވެ.

އެ އޭޖެންސީއިން މިއަދު ނެރުނު ނޫސް ބަޔާނެއްގައި ބުނީ، ފާއިތުވި ދުވަސްތަކުގައި މާލެއާއި ރާއްޖޭގެ އެހެން ރަށްރަށުގެ މަގުމަތީގައި މަސްތުގެ ހާލަތުގައި ތިބޭ ބައެއް ފަރާތްތަކުގެ ފޮޓޯއާއި ވީޑީއޯ ފަތުރަމުން ދާތީ، އަދި އެފަދަ މީހުން ކުށްކުރުމާއި ގުޅިގެން ހިފަހައްޓައި އަނިޔާކޮށް ވީޑިއޯކޮށް މީސްމީޑިއާގެ އެކި މަންސަތަކުގައި ފަތުރަމުންދާ މައްސަލާގައި ރައްޔިތުންގެ ކަންބޮޑުންތައް އެ އޭޖެންސީއަށް ލިބެމުންދާ ކަމަށެވެ. އަދި މި މައްސަލަތަކާ ގުޅިގެން ފުލުހުންނާ ގުޅިގެން އެ އެޖެންސީއިން ހާއްޞަ އޮޕަރޭޝަނެއް ފަށާފައިވާ ކަމަށް ވެސް އެބަޔާނުގައިވެއެވެ.

މަސްތުވާތަކެތި ބޭނުންކުރުމަކީ ޖިނާޢީ ކުށެއްގެ އިތުރުން ޞިއްހަތަށް ވެސް ނުހަނު ގެއްލުން ހުރި ކަމެއްކަން ފާހަގަކޮށް އެންޑީއޭއިން ބުނީ މިހާރުވެސް މަސްތުވާތަކެތި ބޭނުންކުރާ އެތައް ބަޔަކު ތަފާތު ބަލިތަކާ ހަނގުރާމަކުރަމުން ދާކަމަށެވެ. ޕާޓީ ޑްރަގް ނުވަތަ ޕާޓީ ޑްރަގްގެ މާއްދާތަކާއި ބަނގުރަލާއި، އެނޫންވެސް މަސްތުވާތަކެތި ރާއްޖޭގައި ފެތުރިފައިވަނީ ރައްކާތެރި އެއްޗެހީގެ ގޮތުގައި ނަމަވެސް މި ތަކެއްޗަކީ ފުރާނަ އަށް ނުރައްކާވާ ތަކެތި ކަމަށް ވެސް އެ ބަޔާނުގައިވެއެވެ. އަދި ޕާޓީ ކުރުމުގެ ނަމުގައި ފެތުރެމުންދާ މި ނުރައްކާތެރި މަސްތުވާތަކެއްޗާއި އެނޫންވެސް ޒާތްޒާތުގެ މަސުތުވާ މާއްދާތައް ބޭނުން ނުކުރުމަށް އެންޑީއޭއިން ވަނީ ނަސޭހަތްތެރިވެފައެވެ.

Advertisement

މިއަހަރުގެ ފެބްރުއަރީ މަހުގެ 25 ވަނަ ދުވަހުން ފެށިގެން މާރޗް 25 ދުވަހުގެ ނިޔަލަށް މާލެ ސަރަހައްދުގައި ކުރިއަށް ގެންދިޔަ 'އައުޓް ރީޗް' ޕްރޮގްރާމުން، ކަންބޮޑުވާ މިންވަރަކަށް މަސްތުވާތަކެތި ބޭނުންކުރުމުގެ މައްސަލަތަކާއި، ދުންފަތުގެ އިސްތިރުމާލުކުރުމާއި ޕާޓީކުރުމުގެ ތެރެއިން މަސްތުވާތަކެތި ބޭނުންކުރުން އިތުރުވެފައިވާ ކަން ފާހަގަކުރެވިފައިވާ ކަމަށް އެ އެ ބަޔާނުގައިވެއެވެ.

މި މައްސަލަ ހައްލުކުރުމަށް މުޖްތަމައުގެ ފުރިހަމަ އެއްބާރުލުން ބޭނުންވާ ކަމަށް ވެސް އެ ބަޔާނުގައިވެއެވެ. އަދި މަސްތުގެ ހާލަތުގައި ތިބޭ ފަރާތްތައް މަގުމަތިން ފެނިއްޖެނަމަ އެ އެޖެންސީގެ އިމަޖެންސީ ނަމްބަރު 911އަށް ނުވަތަ އެ އެޖެންސީގެ ހޮޓްލައިން 1410 ނަމްބަރަށް ގުޅައި ރިޕޯޓުކުރުމަށް ވަނީ އެ އެޖެންސީ ވަނީ އެދިފައެވެ.