މާލޭގެ ކެފޭއެއްގެ ތެރެއަށް މީހަކު ވަދެ އެ ތަނުގައި ހުރި ބިއްލޫރި ރެކެއް ތަޅާލާ މަންޒަރު ފެންނަ ވީޑިއޯއެއް އާންމުވެ މިއަދު ވަރަށް ބޮޑަށް ވައިރަލްވެފައިވެ އެވެ.

ވީޑިއޯއިން ފެންނަނީ މަގުމަތީ ގައި ހަޅޭލަވަމުން ދިޔަ މީހަކު ކުއްލިއަކަށް ކެފޭތެރެއަށް ވަދެ އެތަނުގައި ހުންނަ ބިދޭސީ މީހާއާ ވާހަކަތަކެއް ދައްކަން ހުރެ ކުއްލިއަކަށް ފައިން ޖަހާ އެ ތަނުގައި ހުރި ބިއްލޫރި ރެކެއް ތަޅާލާ މަންޒަރެވެ. ތަޅާލުމަށް ފަހު ހަޅޭލަވަމުން ނިކުމެގެން ދެ އެވެ.

އޭނާ އެ އަމަލު ހިންގިއިރު އެ ތަނުގައި ސައިބޯން ވެސް މީހުން ތިބެ އެވެ.

Advertisement

ފުލުހުން ބުނީ މާލޭ އިރަމާގޭގައި ހުންނަ ކެފޭއެއްގެ ބިއްލޫރި ރެކެއް ތަޅާލި މައްސަލަ މިއަދު ހެނދުނު 8:56 ހާއިރު ފުލުހަށް ރިޕޯޓް ކޮށްފައިވާ ކަމަށެވެ. މި މައްސަލައާ ގުޅިގެން މީހަކު ހައްޔަރު ނުކުރާ ކަމަށް ވެސް ބުންޏެވެ.

ނަމަވެސް މި މައްސަލަ ތަހުގީގު ކުރަމުން ގެންދާ ކަަމަށް ބުންޏެވެ.

މި އަމަލު ހިންގާފައި ވަނީ ކުށުގެ ރެކޯޑް އޮންނަ މީހެކެވެ. އެއީ މ. ސްޓާ މުހައްމަދު ރަޒީން އެވެ. އުމުރުން 49 އަހަރުގެ އެ މީހާ އަކީ ކުރީން ވެސް މަސްތުވާތަކެތީގެ މައްސަލައެއްގައި ހައްޔަރު ކޮށްފައިވާ މީހެކެވެ.

އަދި ވައްކަމުގެ މައްސަލައެއް ގައި ވެސް ހައްޔަރު ކުރި އެވެ. ދައުވާކޮށް ޝަރީއަތަށް ސާބިތުވެ ޖަލުގައި ވެސް ގިނަ ދުވަހު ހުއްޓެވެ.

މި ފަހުން މަގުމަތީ ހަޅޭލަވާ މީހުންނަށް އުނދަގޫ ކުރަން އުޅޭ މަންޒަރު ފެނެ އެވެ. އޭނާ އެގޮތަށް އުޅޭތީ އެކި ފަހަރު މަތީން މީހުން ފުލުހަށް ރިޕޯޓް ކޮށްފައިވެ އެވެ. ނަމަވެސް މިހާތަނަށް ހައްޔަރެއް ނުކުރެ އެވެ.