އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދަށް އިންސާފު ހޯދުމަށް ގޮވާލާ މުޒާހަރާ ކުރަމުންދާ ޒުވާނުންގެ އަޑު, ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްސަވާ ކަމަށާ އެކަމަަށް ޝުކުރު އަދާ ކުރާ ކަމަށް ޒުވާނުން ބުނެފި އެވެ.
ޒުވާނުންގެ ފަރާތުން އެކަން ހާމަކުރީ މިއަދު އާންމުކުރި ވީޑިއޯ އެއްގަ އެެވެ. އޮންލައިން ނޫހަކަށް ދިން އިންޓަވިއު އެއްގައި މުޒާހަރާތައް އިންތިޒާމު ކުރުމުގައި އިސްކޮށް އުޅޭ ދެ ޒުވާނަކު ބުނީ އެ މުޒާހަރާތަކާ ގުޅޭގޮތުން ބައެއް ކަންކަން ސާފުކޮށް ދޭން ބޭނުންވާ ކަމަށެވެ.
އެއް ކަމަށް ފާހަގަ ކުރީ އެއީ ސިޔާސީ މުޒާހަރާތަކެއް ނޫން ކަމަށެވެ. އަދި އެއީ ސިޔާސީ ޕާޓީއަކާއި ނުވަތަ ސިޔާސީ ބަޔަކާ ވެސް ގުޅުން އޮތް މުޒާހަރާއެއް ނޫން ކަމަށެވެ. މީގެ އިތުރުން ގޭންގުތަކާއި ވެސް ގުޅުމެއް ނޯންނާނެ ކަމަށް ބުންޏެވެ.
އެ ޒުވާނުން ބުނީ އެ މީހުންގެ ބޭނުމަކީ އަނިޔާވި އަންހެން މީހާއަށް އިންސާފު ހޯދުން ކަމަށެވެ. އަދި ފުލުހުންގެ މުއައްސަސާ ޒިންމާދާރު ކުރުވުމެވެ.
އެ ޒުވާނުންގެ ޑިމާންޑްތައް ރައީސް މުއިއްޒު އައްސަވާ ކަމަށް ވެސް ވިދާޅުވި އެެވެ. އަދި އެކަމަށް އެމަނިކުފާނަށް ޝުކުރު ދަންނަވާ ކަމަށް ބުންޏެވެ.
"އަޅުގަނޑުމެން ވަރަށް ޝުކުރު އަދާކުރަން ބޭނުންވޭ އަޅުގަނޑުމެންގެ ރައީސަށް. އަޅުގަނޑުމެންގެ ޑިމާންޑްތައް މަޑުމަޑުން އެބަ ފިލްފުލް ކޮށްދޭ،" އެ ޒުވާނުން ބުންޏެވެ.
އެ ޒުވާނުން ވަނީ މައްސަލަ ބަލަން އުފެއްދި ރިޔާސީ ކޮމިޝަން, ކުރީގެ ކޮމިޝަންތައް ފަދައިން ނުވާނެ ކަމަށް އުންމީދު ކުރާ ކަމަށް ވެސް ބުނެފަ އެވެ.
ހުކުރު ދުވަހުގެ ހާދިސާއާ ގުޅިގެން ރައީސް ގެންދަވަނީ ފިޔަވަޅުތައް އަޅުއްވަމުންނެވެ. ރޭ ވަނީ އެ މައްސަލަ ބަލަން ޚާއްސަ ރިޔާސީ ކޮމިޝަނެއް ވެސް އުފައްދަވާފަ އެވެ. އަދި ފުލުހުން އަމަލު ކުރާ ބައެއް އުސޫލުތަކަށް ބަދަލުގެނެސް އާންމުންނަށް ވީހާވެސް އަވަހަށް މައުލޫމާތު ފޯރުކޮށް ދިނުމަށް ވެސް ވަނީ އަންގަވާފަ އެވެ.
Advertisement
This content is created and paid for by advertisers and does not involve Voice Journalists
