އިޒްރޭލުން ޣައްޒާގައި ހިންގަމުންދާ ލާއިންސާނީ ޢުދުވާނަކީ ސީދާ ޣައްޒާގެ މުސްލިމުންގެ ނަސްލުހޭދު ކުރުމުގެ ނިޔަތުގައި ހިންގަމުންދާ ޖަރީމާއެއް ކަމަށް އިންސާނީ ހައްޤުތަކަށް ވަކާލާތު ކުރާ އެމްނެސްޓީ އިންޓަނޭޝަނަލުން ބުނެފިއެވެ.

އެމްނެޓްސީ އިންޓަނޭޝަނަލުން ބުނާގޮތުން ޣައްޒާގައި ޙަރަކާތްތެރިވާ އިޒްރޭލުގެ އަސްކަރީ ސިފައިން ދަނީ އދގެ ނަސްލުހޭދު ކުރުމާގުޅޭ މުއާހަދާއާއި ޚިލާފަށް، ޣައްޒާގެ ރައްޔިތުންނަށް ޖިސްމާނީ އަދި ނަފްސާނީ ގެއްލުންތައް ދެމުންނެވެ. އަދި ޣައްޒާގެ ރައްޔިތުންގެ ފުރާނައަށް ނުރައްކާވާފަދަ ޙާލަތްތައް މެދުވެރި ކުރުވުމުގެ މަޤްސަދުގައި ގަސްތުގައި ގެއްލުން ދެމުންދާ ކަމަށްވެސް އެ ޖަމުޢިއްޔާއިން ވަނީ ފާހަގަކޮށްފައެވެ. އަދި އިޒްރޭލުން ޣައްޒާގެ ރައްޔިތުން އިންސާނުން ގޮތުގައި ވެސް ނުދެކޭ ކަމަށާއި، އިންސާނީ ހައްޤުތައް ލިބެން ޖެހޭ ބައެއްގެ ގޮތުގައި ވެސް ނުދެކޭ ކަމަށް ވެސް ފާހަގަކުރިއެވެ.

އެމްނެސްޓީ އިންޓަނޭޝަނަލްގެ ސެކެޓްރީ ޖެނެރަލް، އެގްނެސް ކަލަމާޑް ވިދާޅުވެފައިވަނީ 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން ޔަހޫދީން ދަނީ އެ މީހުންގެ ޖަރީމާތައް މުޅި ދުނިޔެއަށް ވަގުތުން ވަގުތަށް ދައްކަމުން ކަމަށެވެ. ޔަހޫދީން ކުށެއްނެތް އެތައް ހާސް ބައެއްގެ ލޭ އޮހޮރުވައި ޝަހީދު ކޮށް، ޢާޢިލާތައް ނައްތާލައި ވުޖޫދުން ފޮހެލައި، ގެދޮރާއި ބިނާރުތައް ސުންނާފަތިކޮށް ފަނާ ކުރަމުންދާއިރު ޤައުމުތަކުން އެ މަންޒަރުތައް ބަލަމުން ދަނީ އެއްވެސް އާރެއްބާރެއް ނެތް ބައެއް ފަދައިން ކަމަށް އޭނާ ވިދާޅުވިއެވެ. އިޒްރޭލުގެ މައްޗަށް ބާރު އޮންނަ ގައުމުތައް މިހާރުން މިހާރަށް އިޒްރޭލަށް އެހީ ފޯރުކޮށްދިނުން ހުއްޓައިލައި، ހިންގަމުންދާ ނަސްލުހޭދު ނިމުމަކަށް ގެންނަން ޖެހޭކަމަށް އޭނާ ވިދާޅުވިއެވެ.

އަދި އިޒްރޭލުން ޣައްޒާއަށް ދެމުންދާ ހަމަލާ ތަކަކީ ހަމާސް ނައްތާލުމަށް އަމާޒުކޮށްގެން ދޭ ހަމަލާތަކެއް ކަމަށް ބުނިކަމުގައި ވިޔަސް އެތައް ވައިގެ ޙަމަލާތަކެއް ތަކުރާރުކޮށް އާންމުންނަށް އަމާޒު ކޮށްފައިވާ ކަމަށް އެ ޖަމިއްޔާއިން ފާހަގަކުރިއެވެ.

2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން ޣައްޒާގެ 51،300 މީހުން ޝަހީދު ކޮށްލާފައިވާ ކަމަށް ފަލަސްޠީނުގެ އިދާރާތަކުން ބުނެއެވެ. އޭގެ ތެރޭގައި 17،400 ކުޑަކުދިން ވެސް ހިމެނެއެވެ.