އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އަދާލަތު ޕާޓީއާ ގުޅިވަޑައިގަތުމަށް ނިންމެވުމުން އެ ޕާޓީގެ އިސް ބައެއް ބޭފުޅުން މަރުހަބާ ވިދާޅުވެއްޖެ އެވެ.
އަދާލަތާއި ގުޅިވަޑައިގަންނަވާކަން މިނިސްޓަރު ދެންމެ ވަނީ އެކަން ރަސްމީކޮށް އިއުލާނު ކުރައްވާފަ އެވެ. އަދި ވިދާޅުވީ އެ ޕާޓީގެ ރައީސްގެ މަގާމަށް ވާދަ ކުރައްވާނެ ކަމަށެވެ.
މިނިސްޓަރު އެކަން އިއުލާނު ކުރެއްވުމާއި ގުޅިގެން އަދާލަތުގެ އިސް މަގާމުތަކުގައި ތިއްބެވި ބައެއް ބޭފުޅުންނާއި އިލްމުވެރީންގެ މަޖިލީހުގެ ބައެއް މެންބަރުން ވަނީ އެ ނިންމެވުމަށް މަރުހަބާ ވިދާޅުވެފަ އެވެ. އޭގެ ތެރޭގައި އިލްމުވެރީންގެ މަޖިލީހުގެ ރައީސް އައްޝައިހް އިލްޔާސް ހުސައިން އާއި ނާއިބު ރައީސް ޑރ, މުހައްމަދު އިޔާޒް އަބްދުލްލަތީފާއި އިލްމުވެރީންގެ މަޖިލީހުގެ އިތުރު މެންބަރުން ހިމެނިވަޑައިގަންނަވަ އެވެ.
އިލްޔާސް ވިދާޅުވީ ޝަހީމްގެ އެ ނިންމެވުމަކީ އަދާލަތު ހަރުދަނާ ކުރެއްވުމަށް ވަރަށް ރަނގަޅު ނިންމެވުމެއް ކަމަށެވެ. ޝަހީމަށް ތާއީދު ކުރައްވާކަން ވެސް ހާމަ ކުރެއްވި އެވެ.
އަދާލަތު ޕާޓީ އުފެއްދުމުގައި އެންމެ އިސް ދައުރެއް އަދާކުރެއްވި އެއް ބޭފުޅަކީ މިނިސްޓަރު ޝަހީމެވެ. އެ ޕާޓީގެ އެއް މުއައްސިސަކީ ވެސް އެމަނިކުފާނެވެ. އަދާލަތުގެ ރަން ދުވަސްތަކުގައި އެ ޕާޓީ ހިންގުމުގައި ވެސް ޝަހީމްގެ ދައުރު ބޮޑެވެ. އެ ޕާޓީއަށް ރައްޔިތުން ކުުރި އިތުބާރު ގެއްލި ޕާޓީގެ ރަން ދުވަސްތައް ގެއްލުނީ އެ ޕާޓީގެ ރައީސް ކަމަށް މިހާރުގެ ރައީސް އިމްރާން ވަޑައިގަތް ފަހުންނެވެ.
މިދިޔަ ދުވަސްތަކުގައި އެ ޕާޓީން ގިނަ މެންބަރުންތަކެއް ވަނީ ވަކިވެފަ އެވެ. އަދި އެ ޕާޓީ އުފެއްދުމުގައި އިސްކޮށް ހަރަކާތްތެރިވި ވަރަށް ގިނަ އިލްމުވެރީން ވެސް ވަނީ އަދާލަތުން ވަކިވެވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
