ވ. އާރަށް ކުއްޔަށް ދިނުމުގެ މުޢާމަލާތާ ގުޅިގެން ކުރީގެ ރައީސް ޢަބްދުالله ޔާމީންގެ މައްޗަށް ކުރާ ރިޝްވަތުގެ ދަޢުވާގައި އެމަނިކުފާނުގެ ފަރާތްޕުޅުން ހުށަހެޅުއްވި ދިފާއީ ހެކިތައް ބަލައިނުގަތުމަށް ދައުލަތުން މިއަދު ޝަރީޢަތުގައި އެދިއްޖެއެވެ.
މިއަދު ކުރިމިނަލް ކޯޓުގައި ބޭއްވި ޕްރީ ޓްރަޔަލް އަޑުއެހުމުގައި ދައުލަތުން ފާހަގަކޮށްފައިވަނީ ރައީސް ޔާމީންގެ އެކައުންޓަށް ޖަމާވި އެއް މިލިއަން ޑޮލަރާ ގުޅޭ ގޮތުން ތަޙުޤީޤު މަރުޙަލާގައި ސުވާލުކުރުމުން އެމަނިކުފާނު ހަނު ހުންނެވި ކަމަށެވެ.
ނަމަވެސް ޝަރީޢަތުގެ މަރުޙަލާގައި އެ ފައިސާއަކީ ޑޮލަރު މާރުކުރުމުގެ މުޢާމަލާތަކުން ލިބުނު ފައިސާ ކަމަށް ވިދާޅުވެ ހެކި ހުށަހެޅުއްވީ ޤާނޫނުގެ 47 ވަނަ މާއްދާގެ (ބ) އާ ޚިލާފަށް ކަމަށް ދައުލަތުން ބުނެފައިވެއެވެ.
އެހެން ކަމުން ޔާމީންގެ ފަރާތްޕުޅުން ހުށަހެޅުއްވި ދިފާއީ ހެކިންވެސް ގަބޫލު ނުކުރަން ދައުލަތުން ވަނީ އެދިފައެވެ.
އެގޮތުން ގަބޫލު ނުކުރަން އެދިފައިވަނީ؛
އަހުމަދު ނަރީޝް (މާލޭގެ ކުރީގެ ޑެޕިއުޓީ މޭޔަރު / ޔޫތު މިނިސްޓަރުގެ އެޑްވައިޒަރު)
އަބްދުالله ރަޝީދު
މުހައްމަދު އިސްމާއީލް (ވިލިމާލެ ދާއިރާގެ މަޖިލިސް މެންބަރު)
މުހައްމަދު ޝާހިދު (ހުޅުދޫ ދާއިރާގެ މަޖިލިސް މެންބަރު)
ޑޮލަރު މާރުކުރިކަން ބަޔާންކޮށްދޭ ލިޔުން
ދައުލަތުގެ ހުއްޖަތް
ރައީސް ޔާމީންގެ ވަކީލުން ރައްދުގައި ވިދާޅުވީ ފުލުހުން ހާޒިރުކުރީ ކުރީން އެންގުމަކާ ނުލައި ކަމަށާ، އެފަދައިން ހާޒިރު ކުރުމުން މާލީ މުޢާމަލާތްތަކާ ގުޅޭ ގޮތުން ސުވާލުކުރާ ހާލަތެއްގައި ކޮންމެ މީހަކު ވެސް އެކަމުން ސަލާމަތްވާން ބޭނުންވާނެ ކަމަށެވެ. އަދި އެފަދަ ގޮތަކަށް ހަނު ހުރުމުން އެ މާއްދާގެ ނާޖާއިޒް ފައިދާ ދައުލަތަށް ނެގޭނެ ކަމަށް ނުދެކެވޭނެ ކަމަށެވެ.
ދެ ފަރާތުގެ ހުށަހެޅުންތަކަށްފަހު ގާޒީ ވަނީ އަންނަ މަހު 12 ގައި ފުއްގިރި މައްސަލައިގެ އަޑުއެހުމަކަށް ފަހު އާރަށު މައްސަލައިގެ އިތުރު އަޑުއެހުމެއް ބާއްވާނެ ކަން އިޢުލާނުކުރައްވައި މި އަހަރު ތެރޭގައި މައްސަލަ ނިންމައިލައްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
