ތުއްތު ކުއްޖަކު ސުކޫލުން ނިިކުމެގެން ދިޔަ ހާދިސާއެއް ހިނގައިފި އެވެ.

އެކަން ހާމަކޮށް އެޑިއުކޭޝަން މިނިސްޓަރު އިސްމާއީލް ޝަފީއު ވިދާޅުވީ ހުޅުމާލޭގައި ސްކޫލެއްގައި ކީ-ސްޓޭޖް 1ގެ ދަރިވަރަކު ސްކޫލު ގަޑީގައި، މުދައްރިސުން ބޭނުންކުރާ ގޭޓުން ނުކުމެގެން ދުވެފައި ސްކޫލު ނެއިބާހުޑުގެ ތެރެއަށް ދިޔަކަމުގެ މައުލޫމާތު ލިބުނު ކަމަށެވެ.

އަދި މިނިސްޓްރީގެ ކަމާގުޅުންހުރި ޑިޕާޓުމެންޓުތަކުގެ ސަމާލުކަމަށް މިކަން އައިސް އޭނާއަށް ރިޕޯޓު ކުރީ މިއަދު 3:11 ގައި ކަމަށް ވިދާޅުވި އެވެ.

Advertisement

މޯލްޑިވްސް ޕޮލިސް ސާވިސްގެ އެހީތެރިކަމާއެކު މިނިސްޓްރީ އާއި ސްކޫލުން ކުރި މަސައްކަތުން 3:31ގައި ދަރިވަރު ހޯދާފައިވާ ކަމަށާ ކުއްޖާއަށް އެއްވެސް ގެއްލުމުއް ލިބިފައިނެތް ކަމަށެވެ.

ޝަފީއު ވިދާޅުވީ އޭނާ އެކަން ހާމަކުރެއްވީ ދެ ބޭނުމެއްގައި ކަމަށެވެ. އެއް ކަމަކީ މިފަދަ ކަމެއް ހިނގުމުން އެކަމެއް ނުފޮރުވާ ނިޒާމު ހަރުދަނާ ކުރުމަށް އެންމެން ގުޅިގެން މަސައްކަތްކުރުމުގެ ބޭނުންތެރިކަން ފާހަގަކުރުން ކަމަށް ވިދާޅުވި އެވެ. އަދި ހާދިސާ ހިނގި ސްކޫލުގައި، މުދައްރިސުން ބޭނުންކުރާ ގޭޓަކީ ތަޅުލާފައިވާ ނުވަތަ ފާރަވެރިއަކު ހުންނަން ޖެހޭގޮތަށް ނިންމާފައިވާ ގޭޓަކަށް ވީއިރު ދަރިވަރަށް ގޭޓުން ނުކުމެވުނީ ކީއްވެގެންތޯ ދެނެގަނެ އެފަދަ ކަމެއް ތަކުރާރު ނުވާނެފަދަ ގޮތަށް ފިޔަވަޅުއަޅާނެ ކަމުގެ ޔަގީންކަން ސްކޫލުގެ އެންމެހާ މަސްލަހަތުވެރިންނަށް ދިނުން ކަމަށެވެ.

މި ހާދިސާ ހިނގި ސުކޫލެއް މިނިސްޓްރީން ހާމައެއް ނުކުރެ އެވެ.