ހދ.ނެއްލައިދޫ ބައެއްގެ ގޮތުގައި ހިރިނައިދޫ ހަމަޖައްސައިފި
ހދ.އަތޮޅު ނެއްލައިދޫ ބައެއްގެ ގޮތުގައި އެރަށް ކައިރީ އޮންނަ ހިރިނައިދޫ ކަނޑައަޅައި އެކަން ރައީސުލްޖުމްހޫރިއްޔާ މިއަދު އިއުލާނުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުން މިއަދު ބުނީ، ނެއްލައިދޫ ރައްޔިތުންނަށް އިޤުތިޞާދީ ނަފާ ހޯދޭނެ މަގުފަހިކުރުމަށް ތިލަދުންމަތީ ދެކުނުބުރީ "ހިރިނައިދޫ" އަކީ އެ އަތޮޅު "ނެއްލައިދޫ" ގެ ބައެއް ކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކަނޑައަޅުއްވައި ނިންމަވާފައިވާކަމަށެވެ. އެމަނިކުފާނު މިގޮތަށް ކަނޑައަޅުއްވައިފައިވާކަން ހާމަކުރެއްވީ މިއަދު ނެރުއްވި ނަންބަރު، 13/2025 ޤަރާރުގައެވެ.
މިއަދު ނެރުއްވި ޤަރާރުގައި ވަނީ މީހުން ދިރިއުޅެމުންދާ ރަށްތަކުގެ ލިސްޓަށް ނެއްލައިދޫ ބައެއްގެ ގޮތުގައި ހިރިނައިދޫ އިތުރުކުރިކަމަށް ބަޔާންކޮށްފައެވެ. އަދި "ހިރިނައިދޫ" ގެ ނަން ދިވެހިބަހުންނާއި އިނގިރޭސިބަހުން ލިޔަންވީ ގޮތްވެސް ވަނީ ބަޔާންކޮށްފައެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިދިޔަ އަހަރުގެ ފެބުރުއަރީމަހު ހދ އަތޮޅަށް ކުރެއްވި ޒިޔާރަތުގައި ވެއްލައިދުއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ވަނީ، އެރަށުގެ ރައްޔިތުންނަށް އިޤުތިޞާދީ ނަފާ ހޯދޭނެ ރަށެއްގެ ގޮތުގައި ކައިރީގައިވާ ހިރިނައިދޫ ހަމަޖައްސަވައިދެއްވާނެކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
