ސިޔާސީ ފިކުރަށް ބަލައިގެން، މީހުން ވަޒީފާއިން ވަކި ކުރުމަކީ ޑިމޮކްރަސީއާ ބީރައްޓެހި ޢަމަލެއްކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.

އެމަނިކުފާނު ސޯޝަލް މީޑިއާއަށް ދޫކޮށްލި ޕޯސްޓެއްގައި ވިދާޅުވީ، ސިޔާސީ ފިކުރަށް ބަލައިގެން، މީހުން ވަޒީފާއިން ވަކިކުރުމަކީ، ޑިމޮކްރަސީއާ ބީރައްޓެހި އަމަލެއް ކަމަށާއި އަދި އެ ނިގުޅައިގަނެވެނީ ޤާނޫނު އަސާސީން ކަށަވަރުކޮށްދީފައިވާ ޙައްޤެއް ކަމަށެވެ. ވަކި ޕާޓީއެއްގެ މެމްބަރަކަށް ވީތީ ވަޒީފާއިން ވަކިކުރުން ބަލައެއް ނުގަނެވޭނެ ކަން ފާހަގަކުރައްވާ ފައިސަލް ނަސީމް ވިދާޅުވީ، ކޮންމެ މުވައްޒަފަކަށްވެސް އަބުރުވެރި ދިރިއުޅުމެއް އުޅެވޭނެ އުޖޫރައަކާއި ރައްކާތެރި މަސައްކަތު މާހައުލަކާއި ހިޔާލުފާޅުކުރުމުގެ ޙައްޤު ކަށަވަރުވާންޖެހޭނެ ކަމަށެވެ.

މި ޕޯސްޓަކީ، އައްޑޫ ހިތަދޫގައި އިދިކޮޅު އެމްޑީޕީން ބޭއްވި ހަރަކާތުގައި ބައިވެރިވި ވެމްކޯގެ ދެ މުވައްޒަފަކު ވަޒީފާ އިން ވަކިކޮށްފައިވާ ކަމަށް ތުހުމަތުކުރުމާ ގުޅިގެން ފައިސަލް ނަސީމް ކުރި ޕޯސްޓެކެވެ. މިކަމާ ގުޅިގެން، އެމްޑީޕީގެ އިސްވެރިން ދަނީ ސަރުކާރަށް ވަރަށް ބޮޑަށް ފާޑު ކިޔުންތައް އަމާޒުކުރަމުންނެވެ. އެގޮތުން، ކުރީގެ ރައީސް އިބްރާހިމް މުހައްމަދު ސޯލިޙްވެސް ވަނީ ސަރުކާރަށް ފާޑުވިދާޅުވެފައެވެ.