އަދާލަތު ޕާޓީއާ ގުޅިވަޑައިގަންނަވަނީ ފުރިހަމަ ޝާމިލް ތަސައްވުރަކާއެކު ކަމަށް އިސްލާމިކް މިނިސްޓަރު އަދި އެ ޕާޓީގެ އެއް މުއައްސިސް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމް އިއްޔެ ވަނީ އަދާލަތު ޕާޓިއާ ގުޅިވަޑައިގަންނަވަން ނިންމަވާފައިވާ ކަމަށް ވިދާޅުވެފަ އެވެ.

އަދި ރާއްޖޭގެ ކަންކޮޅުތަކުގައި ތިބި އަދާލަތު ޕާޓީގެ މުއައްސިސުންނާއި ދާއިރާތަކުގެ ރައީސުންނާއި އާންމު މެންބަރުން މިއަދު ވަނީ އެމަނިކުފާނުގެ ތަސައްވުރު ހިއްސާ ކުރައްވާފަ އެވެ.

Advertisement

ޝަހީމް ވިދާޅުވީ އަދާލަތު ޕާޓީއާ ގުޅިވަޑައިގަތުމަށް ނިންމަވާފައިވަނީ ފުރިހަމަ ޝާމިލް ތަސައްވުރަކާ އެކު ކަމަށެވެ.

"...އިންޝާ ﷲ ޕާޓީގެ އެތެރޭގެ އިންތިޚާބުގައި ވާދަކުރާނަން. މެންބަރުން ޕާޓީގެ ރައީސްކަމަށް އަޅުގަނޑު އިންތިހަބު ކޮށްފި ނަމަ ޕާޓީ ކުރިއަރުވަން ގިނަ މަސައްކަތްތަކެއް ކުރާނަން. އެންމެ ފުރަތަމަ ކުރާނެ އެއްކަމަކީ ޕާޓީގެ ސަފުތައް އަލުން އިއާދަކުރުން. ޕާޓީގެ އެއްބައިވަންތަކަން ގާއިމު ކުރުން. ޕާޓީ އުފެއްދުމަށް މަސައްކަތްކުރެއްވި ބޭފުޅުންނާއި އިލްމުވެރިން ޕާޓީގެ ހިޔާވަހިކަމުގެ ތެރެއަށް ގެނައުން,"

ދެވަނަ އަށް އިސްކަންދޭނެ ކަމަކީ އޭޕީ ޑިވެލޮޕްމަންޓް ފަންޑުގެ ނަމުގައި މެންބަރުން ޝާމިލުވާނެހެން ޕާޓީގެ ފަންޑެއް ގާއިމުކޮށް ޕާޓީގެ އަމިއްލަ ފުދުންތެރިކަން ގާއިމުކުރަށް މަސައްކަތް ކުރުމަށް ކަމަށް ވިދާޅުވި އެވެ. މީގެ މަގުސަދަކީ، މެމްބަރުން ބިނާކުރުމާއި މެންބަރުން އިތުރު ކުރުމާއި މެމްބަރުންނަށް ޒަމާނީ މަތީ ތައުލީމު ދިނުމާއި ހާއްސަ ހާލަތްތަކުގައި އެހީވުމާއި އިންތިހާބުތަކުގައި ހަރަދަށް ބޭނުންވާ ފައިސާ ހަލާލުގޮތުގައި ހޯދުން ކަމަށް ވިދާޅުވި އެވެ.

އަދި މިފަންޑު ފުޅާ ކުރުމަށް އިންވެސްޓްކުރެވޭނެ ނިޒާމެއް ގާއިމުކުރައްވާނެ ކަމަށް ވިދާޅުވި އެވެ. މިފަންޑު ބަލަހައްޓަން މެންބަރުންގެ ތެރެއިން ބޯޑް އޮފް ޓްރަސްޓީސް އެއް އުފައްދާނެ ކަމަށާ ފަންޑުގެ ސީއީއޯ އަކަށް ލާނީ އިސްލާމީ އިގްތިސާދު ކިޔަވައިފައި ހުރި ތަޖުރިބާކާރު ޕާޓީގެ މެންބަރެއް ކަމަށް ވިދާޅުވި އެވެ. އަދި ވިދާޅުވީ މިފަންޑު ގާއިމުކުރާނީ މެންބަރުންގެ ކޮންޓްރިބިއުޝަނާއި ފަހުން އަދާކުރާގޮތައް އިސްލާމީ އުސޫލުން ހޯދާ ލޯނުން ކަމަށެވެ.

މީގެ އިތުރުން އިލްމުވެރިންގެ މަޖްލިސްގެ ދައުރު ފުޅާކޮށް އަދާލަތު އެކަމަކަށްޓަކައި ގާއިމުވި އަސާސްތައް ރާއްޖޭގައި ދަމަހައްޓަން އިސްލާމީ ރިސާލަތު ނަގަހައްޓައި ފެތުރުން ވަރުގަދަ ކޮށް ފުޅާ ކުރައްވާނެ ކަމަށެވެ.

އިސްލާމީ މަކާރިމުލްއަހްލާގުގެ އިމުގެ ތެރެއިން ޒުވާނުންނާއި އަންހެނުންގެ ދައުރު ޕާޓީގައި ފުޅާ ކުރައްވާނެ ކަމަށް ވެސް ވިދާޅުވި އެވެ. އަދި ވިދާޅުވީ ބައިނަލްއަގްވާމީ ޖަމާއަތްތަކާއި އަވަށްޓެރި ގައުމުތަކާ ރަނގަޅު ގުޅުމެއް ގާއިމުކުރައްވާ ފަލަސްތީނުގެ މައްސަލައަށް ޕާޓީގެ ހާއްސަ މަންދޫބެއް އައްޔަން ކުރައްވާނެ ކަމަށެވެ.

"..އަދި އިސްލާމީ ދުނިޔެއާ ގުޅުންތައް ބަދަހި ކޮށް އިސްލާމީ އުސޫލުތަކުގެ މައްޗަށް ބިނާވެފައިވާ ޒަމާނީ ހަރުދަނާ ޕާޓީއަކަށް އަދާލަތު ޕާޓީ ހަދާނަން. އިންތިހާބުތަކުގައި ވަކި މީހަކަށް ތާއިދުކުރުމަށް ޕާޓީއަށް މަޖްބޫރެއް ނުކުރާނަން. ޕާޓީގެ ކަންކަން ނިންމާނީ ދިމުގްރާތީ އުސޫލުން މަޝްވަރާގެ ތެރެއިން. ހިޔާލުތަފާތުވުމަށް ޖާގަ ދޭނަން. އަޅުގަނޑުގެ ދައުރު ނިމޭ އިރު ޕާޓީގެ ޒައާމަތަށް އަންނާނެ މީހުން ތައްޔާރުކުރާނަން. ޕާޓީގެ ދާއިމީ މަރުކަޒީ އޮފީހެއް ގާއިމުކުރާނަން. މި ނޫންވެސް މުހިންމު ގިނަކަންކަން ޕާޓީ ކުރިއަރުވަން ކުރާނަން," މިނިސްޓަރު ޝަހީމް ވިދާޅުވި އެވެ.