‏މަސައްކަތްތެރީންގެ ދުވަސް ނުވަތަ މޭޑޭ އަކީ ބޭއިންސާފު އަމަލުތަކާ ދެކޮޅަށް ހިތްވަރާއެކު މަސައްކަތް ކުރުމަށް ލިބޭ މުހިންމު ފުރުސަތެއް ކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެ އެވެ.

ފައްޔާޒް މިހެން ވިދާޅުވީ މޭޑޭގެ ތަހުނިޔާ އެންމެހާ މަސައްކަތްތެރިންނަށް އަރިސްކޮށް މިއަދު ކުރެއްވި ޕޯސްޓެއްގަ އެވެ.

އިދިކޮޅު މައި ޕާޓީގެ ހިންގުމުގެ އެންމެ އިސް ދައުރު އަދާކުރައްވާ ފައްޔާޒު ވިދާޅުވި ގޮތުގައި މޭޑޭ އަކީ މަސައްކަތްތެރިންގެ ހައްގުތައް ހޯދުމަށް އޭރު އޮތް ނުރައްކާތެރި މާހައުލެއްގައި ކުރެވުނު ހިތްވަރުގަދަ މަސައްކަތްތައް ހަނދާންކޮށް، ރާއްޖެއިން ހޯދާފައިވާ ކާމިޔާބުތައް ހަނދާންކޮށްދޭ ކަމެވެ.

Advertisement

އަދި މިއީ އެ ހައްގުތައް ސަރުކާރު އިސްވެ ހަނިކުރަމުންދާ ދަނޑިވަޅެއްގައި، އެ ބޭއިންސާފު އަމަލުތަކާ ދެކޮޅަށް ހިތްވަރާއެކު މަސައްކަތް ކުރުމުގެ އަޒުމް ކަނޑައެޅުމަށް ލިބޭ މުހިންމު ފުރުސަތެއް ކަމުގައި ވިދާޅުވި އެވެ.

‏ފައްޔާޒު ވިދާޅުވީ އެމްޑީޕީއަކީ ރާއްޖޭގައި މަސައްކަތްތެރިންގެ ވާހަކަ ދައްކައި، އެ ހައްގުތައް ފުޅާ ދާއިރާއެއްގައި ހޯދައިދިނުމަށް ވަކާލާތުކޮށްފައިވާ ޕާޓީއެކެވެ. އަދި އެ ޕާޓީއިން އަބަދުވެސް މަސައްކަތް ކުރާނީ މަސައްކަތްތެރިންނަށް ހައްގުވާ މިންވަރު ހޯދައިދީ ވަރުގަދަ އިގުތިސޯދެއް ބިނާކުރުމަށް ކަމަށް ވިދާޅުވި އެވެ.