މި އަހަރުގެ މޭޑޭ ގައި ފެނުނީ އެމްޑީޕީއަށް އިދިކޮޅު ޕާޓީއެއްގެ ފުރިހަމަ ޒިންމާ އަދާނުކުރެވުނު ތަން ކަމަށް ވިދާޅުވެ އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ މޫސަ) އެ ޕާޓީގެ މިހާރުގެ ވެރީންނަށް ފާޑު ވިދާޅުވެއްޖެ އެވެ.
އެކްސްގައި އާންމު ކުރެއްވި ވީޑިއޯ މެސެޖެއްގައި މޫސަ ވަނީ އެމްޑީޕީގެ ޗެއާޕަސަން ފައްޔާޒް އިސްމާއީލް އާއި އެ ޕާޓީގެ ރައީސް އަބްދުﷲ ޝާހިދަށް ނުސީދާކޮށް ބަހުގެ ހަމަލާ ދެއްވާފަ އެވެ.
ވިދާޅުވީ އެމްޑީޕީގެ ވެރީންނަށް އޮތީ ރާއްޖޭގެ އެކިކަންކޮޅުތަކަށް ދަތުރުކޮށް ރިޔާސީ އިންތިހާބަށް ތައްޔާރުވޭ ހީވާ ދަރަޖައަށް ކަންކަން ގޮސްފައިވާ ކަމަށެވެ. މޫސަ މިހެން ވިދާޅުވިއިރު ފައްޔާޒާއި ޝާހިދު އުޅުއްވަނީ ޕާޓީގެ ރަސްމީ ދަތުރެއްގައި އަތޮޅުތެރޭގަ އެވެ.
މޫސަ ވިދާޅުވީ އެމްޑީޕިގެ ރޫހު ނެތި އެއްވެސް އިންތިހާބެއް ކާމިޔާބެއް ނުކުރެވޭނެ ކަމަށެެވެ. އަދި 2006 ވަނަ އަހަރުން ފެށިގެން އެމްޑީޕީން މޭޑޭ ރެލީ ބާއްވަމުން ދިޔަ ނަމަވެސް މި އަހަރާ ހަމައަށް އަައިއިރު އެމްޑީޕީން އެއްވެެސް ކަމެއް ކުރާތަން ނުފެންނަ ކަމަށެވެ.
“ހިތާމައާއެކީ ދަންނަވަން ޖެހެނީ 2025 ވަަނަ އަހަރާ ހަމައަށް އެމްޑީޕީ އަައިއިރުގަ އެމްޑީޕީގެ ހުރިހާ ހަރަކާތްތަކެއް ހުއްޓި އަދި ހާއްސަކޮށް މޭޑޭ ރެލީއާ ހަމައަށް އައިއިރު މޭޑޭ ރެލީގެ އެއްވެސް ކަމެއް ކުރާތަން ނުފެނި މިދަނީ،”
މޫސަ ވިދާޅުވީ މިހާތަނަށަ އެމްޑީޕީއަށް ނާކާމިޔާބު ވެފައި ވަނީ އާންމު މެންބަރުންގެ ބައިވެރިވުން ނެތި ކަންކަން ކުރުމުން ކަމަށެވެ.
އެހެން ކަމުން އެމްޑީޕީ އަސްލު ރޫހަށް އަންނަން ޖެހޭ ކަމަށް ވިދާޅުވުމަށެވެ. އެކަމަށްޓަކާ މިހާރު ޕާޓީގެ ވެރީން ބަދަލު ކުރަން ޖެހޭނަމަ ބަދަލުކޮށްގެން ނަމަވެސް އެ ރޫހު ގެނެސް އެމްޑީޕީ ވަރުގަދަ ކަމާއެކު ތެދުވާން ޖެހޭ ކަމަށް މޫސަ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
