ދިވެހި ސަރުކާރުން އިސްރާއީލް ޕާސްޕޯޓް މަނާކުރަން ނިންމި ނިންމުމަކީ ފަހުރުވެރި ނިންމުމެއްކަމަށާއި، އެކަން އެގޮތުގައި ދެމިއޮންނާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ޑރ.މުހައްމަދު މުއިއްޒު ވިދާޅުވީ އިސްރާއީލް ޕާސްޕޯޓް މަނާކުރުމަށް ނިންމި ނިންމުމަކީ ފަލަސްތީނު ރައްޔިތުގެ ހައްޤުގައި ދިވެހި ހުރިހާ ރައްޔިތުންގެ ފަރާތުން ސަރުކާރުން ނިންމި ނިންމުމެއް ކަމަށެވެ.
އިސްރާއީލްގެ ޕާސްޕޯޓް މަނާކުރާ މައްދާ ހިމެނޭ ބިލް ރައްޔިތުންގެ މަޖިލީހުން ފާސްކޮށް ރައީސުލްޖުމްހޫރިއްޔާ އެބިލް ތަސްދީގްކުރެއްވީ މިދިޔަ އޭޕްރިލްމަހުގެ 15 ވަނަ ދުވަހުއެވެ.
ރައީސް ވިދާޅުވީ، އެ ނިންމުމަކީ ދިވެހިތާރީހުގައިވެސް ނިންމުނު ފަހުރުވެރި ނިންމުމެއް ކަމަށާއި، ދިވެހިން ތިބޭނީ އަބަދުވެސް ފަލަސްތީނު ރައްޔިތުންގެ ހައްޤުގައި ކަމަށެވެ.
އަޅުގަނޑުމެންގެ ޤައުމު ކުޑަވެދާނެ. އެހެންނަމަވެސް 100 އިންސައްތަ އިސްލާމް ޤައުމެއް، އަޅުގަނޑުމެން އެކަމާ ދެކޮޅުކަން ހާމަކުރީ
ރައީސް ޑރ.މުއިއްޒު ވިދާޅުވިއެވެ
ސަރުކާރުން އިސްރާއީލް ޕާސްޕޯޓް މަނާކޮށްފައިވަނީ، އިސްރާއީލުން ފަލަސްޠީނުގެ ދަރިފަސްކޮޅު ނައްތައިލުމަށް ހިންގަމުންދާ ލާއިންސާނީ އަމަލުތަކާއި ގަތުލުއާންމާ ދެކޮޅަށް ދިވެހިރާއްޖެއިން ފިޔަވަޅުއެޅުމުގެ ގޮތުންނެވެ.
ސަރުކާރުން ދަނީ ބައިނަލްއަގުވާމީ އެކި މަންސަތަކުގައި ފަލަސްޠީނުގެ އުޚުއްވަތްތެރި ރައްޔިތުންގެ ޙައްޤުގައި ގިނަ މަސައްކަތްތަކެއް ކުރައްވަމުންނެވެ. އިރުމަތީ ޤުދުސް ހިމެނޭގޮތަށް 1967 ވަނަ އަހަރުގެ ކުރިން އޮތް ބޯޑަރުތަކާ އެއްގޮތްވާގޮތުގެ މަތީން، ފަލަސްޠީނުގައި މިނިވަން ދައުލަތެއް ޤާއިމުކުރުމަށާއި އދ.ގެ ފުރިހަމަ މެންބަރުކަން ފަލަސްޠީނަށް ދިނުމަށްވެސް ރައީސް ވަނީ މީގެ ކުރިން އެތައް ފަހަރަކު ބައިނަލްއަޤްވާމީ މައިދާނުގައި ގޮވާލައްވާފައެވެ.
ސަރުކާރުގެ ހާރިޖީ ސިޔާސަތާ ބެހޭގޮތުން މިއަދުގެ ނޫސްވެރިްނގެ ބައްދަލުވުމުގައި ރައީސް ޑރ.މުއިއްޒު ވިދާޅުވީ، މި ސަރުކާރުގެ ސިޔާސަތަކީ ހުރިހާ ޤައުމަކާއެކުވެސް ހަމަޖެހިފައިވާ އުސޫލުން ގުޅުންތައް ބޭއްވުން ކަމަށެވެ. މިގޮތުން ދިވެހިންގެ މިނިވަންކަމާއި އިސްތިގުލާލަށް އިހުތިރާމްކުރާ ހަމަ ހުރިހާ ޤައުމަކާއެކުވެސް ގުޅުންތައް އޮންނާނޭކަމަށެވެ.
Advertisement
This content is created and paid for by advertisers and does not involve Voice Journalists
