ސަރުކާރުގެ މަޝްރޫޢުތަކުގައި ބިން ހިއްކުމުގެ ބަދަލުގައި ބިން ދިނުމަށް ކުރިން ހަދާފައިވާ އެގްރިމެންޓްތައް ބާތިލްކޮށްފިކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މީގެ ކުރިން ސަރުކާރުތަކުން ވަނީ އެކިއެކި މަޝްރޫޢުތައް ހިންގާ ފަރާތްތަކަށް ބަދަލުގައި ބިންތައް ލިބޭނޭ އުސޫލެއް ކަނދައަޅައި އެމަގުން ކަންކަން ކުރިއަށްގެންގޮސްފައެވެ. މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސްަ ޑރ.މުހައްމަދު މުއިއްޒު ވިދާޅުވީ، ސަރުކާރުން ކުރިއަށްގެންދާ ބޯހިޔާވަހިކަމާއި އެނޫންވެސް ބިން ހިއްކުމުގެ މަޝްރޫޢުތަކުގައި އެ މަޝްރޫޢުއެއް ހިންގާ ކުންފުންޏަކަށް ބަދަލެއްގެ ގޮތުގައި ބިން ދިނުމަށް މީގެ ކުރިން ހަދާފައިވާ ހުރިހާ އެގްރީމެންޓުތަކެއް ބާތިލްކޮށްފައިވާކަމަށެވެ. ރައީސް ވިދާޅުވީ، މި ސަރުކާރުން މަޝްރޫޢުތައް ކުރިއަށްގެންދާނީ އެބަޔަކު މަޝްރޫޢުއައް ހަރަދުކުރިނަމަވެސް، އެފަރާތަކަށް ދިގު މުއްދަތަކަށް ނުވަތަ އެނޫންވެސް އުސޫލަކުންނަމަވެސް ބިން ނުލިބޭ ގޮތަށް ކަމަށެވެ.

ރައީސް ވިދާޅުވީ ރައީސް ވިދާޅުވީ މިހާރުވެސް ގިނަ މަޝްރޫޢުތަކެއްގެ ބިން ހިއްކުން ކުރިއަށްގެންގޮސްފައި ހުރީ އެ މަޝްރޫޢުތައް ހިންގާ ކުންފުނިތަކަށް ބިންތައް ދޭ އުސޫލުންކަމަށެވެ. މިގޮތުން ގިރާވަރުފަޅާއި، ހުޅުމާލޭ ފޭސް 3 ގެ ބިންހިއްކުންވެސް ކުރިއަށްގެންދިއުމަށް އެއްބަސްވެފައިވަނީ އެފަރާތްތަކަށް ބިންތައް ލިބޭ ގޮތަށް ކަމަށާއި، މިހާރު އެތަންތަނުގެ ބިންތައް ލިބޭގޮތަށް އޮންނައޮތުން ނިމުމަކަށް ގެނެސްފައިވާކަމަށެވެ.

ރާއްޖޭގައި އެކިއެކި މަޝްރޫޢުތައް ހިންގާ ފަރާތްތަކަށް އެކި ހިސާބުތަކުން ބިންތައް ދިނުމަކީ ކުރީގެ ސަރުކާރުތަކުން ގެންގުޅެމުންއައި އާއްމު ސިޔާސަތެކެވެ. ސަރުކާރުތަކުން މީގެ ކުރިން އެބީދައިން ކަންކަން ކޮށްފައިވަނީ ދައުލަތުގެ ބަޖެޓަށް ބާރުބޮޑުވިޔަ ނުދިނުމަށްކަމަށް އޭރު ސަރުކާރުތަކުން ވަނީ ބުނެފައެވެ. އެގޮތުން ގިނަ އަދަދެއްގެ ބިންތައް މުހިއްމު ހިސާބުތަކުން ދީފައިވާއިރު، އެކަމުގެ ސަބަބުން މާލެ ސަރަހައްދުގައި ރައްޔިތުންގެ ބޭނުންތަކަށް ބޭނުން ނުކުރެވި ސަރުކާރަށް ބާރު ނުހިންގޭގޮތަށް އެތައް ބިންތަކެއް ހުރިކަން ފާހަގަކޮށްލެވެއެވެ.