މާލޭގައި ކުރިއަށް ގެންދިޔަ އިހުތިޖާޖާ ގުޅިގެން ހައްޔަރު ކުރި ދެ މީހުން ދޫކޮށްލައިފި އެވެ.
ޒުވާނުންގެ އިހުތިޖާޖުގެ ތެރެއިން ހައްޔަރު ކުރީ ނ.ކުޑަފަރި / ބަގީޗާގެ އަބްދުﷲ މަހްޒޫމް މާޖިދު (28އ) އާއި މ. ހަސްތީ / މާލެ، އާއިޝަތު ޝިމަން އަހްމަދު (19އ) އެވެ. އެ ދެ މީހުންގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން ތިން ދުވަހުގެ ބަންދުގެ މުއްދަތެއް ދިނެވެ.
ނަމަވެސް ފުލުހުން މިރޭ ވަނީ އެ ދެ މީހުން ދޫކޮށްލާފަ އެވެ. އެ ދެ މީހުން ދޫކޮށްލީ ބަންދުގައި ބައިތިއްބަން ޖެހޭ އިތުރު ސަބަބެއް ނެތުމުންނެވެ.
ފުލުހުން ބުނީ އަބްދުﷲ މަހްޒޫމް މާޖިދު ފުލުހުންގެ ބެލުމުގެ ދަށަށް ގެނެސްފައި ވަނީ ފުލުހުންގެ ވާޖިބު އަދާކުރުމަށް ހުރަސްއަޅައި އަމުރަށް ނުކިޔަމަންތެރިވެ ފުލުހަކަށް ހަމަލާދޭން މަސައްކަތް ކުރި ކަމުގެ ތުހުމަތުގައި ކަމަށެވެ. އަދި އާއިޝަތު ޝިމަން އަހްމަދު ފުލުހުންގެ ބެލުމުގެ ދަށަށް ގެނެސްފައި ވަނީ ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސްއެޅިކަމުގެ ތުހުމަތުގައި ކަމަށެވެ.
އެ ދެ މީހުން ދޫކޮށްލުމުން މިހާރު ހުރީ ކާނިވާ ސަރަހައްދުގައި މުޒާހަރާގަ އެވެ.
ޒުވާނުންގެ މުޒާހަރާ ކާނިވަލަށް ބަދަލުކުރީ ގާނޫނާއި ހިލާފަށް މުޒާހަރާ ކުރަން ފުރުސަތު ނުދޭނެ ކަމަށް ފުލުހުން އިންޒާރު ދިނުމުންނެވެ.
Advertisement
This content is created and paid for by advertisers and does not involve Voice Journalists
