ރާއްޖޭގެ ވަރަށް ގިނަ ނުރަނގަޅު ކަންކަމުގެ އަސްލަކީ ރިޔާސީ ނިޒާމް ކަމުގައި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނު ދެކެވަޑައިގަންނަވާ ގޮތުގައި ރާއްޖޭގައި ހުރި ނުރަނގަޅު ކަންކަމަކީ ވަކި ވެރިއެއްގެ މައްސަލައެއް ނޫން ކަމަށެވެ. 

ރައީސް ނަޝީދަކީ ފެށުނީއްސުރެވެސް ބަރުލަމާނީ ނިޒާމަށް ތާއީދު ކުރައްވާ ބޭފުޅެކެވެ. ނިމިދިޔަ ސަރުކާރުގައި އެމްޑީޕީ ލީޑަޝިޕްގެ މެދުގައި ބައިބައިވުން އުފެދި ޕާޓީ ”ރޫޅިގެން“ ދިޔަ ސަބަބު ތަކުގެ ތެރެއިން އެއް ސަބަބަކީވެސް އޭރު ވެރިކަމުގައި ހުންނެވި، ރައީސް ނަޝީދުގެ ގާތް އެކުވެރި ރައީސް އިބްރާހީމް މުޙައްމަދު ޞާލިހް އާއި އެމަނިކުފާނަށް ތާއީދު ކުރައްވާ އެމްޑީޕީ މެންބަރުން ވެރިކަމުގެ ނިޒާމް ބަރުލަމާނީ ނިޒާމަށް ބަދަލު ކުރުމަށް ފެންނަ ނުފެންނަ ވޯޓެއް ނަގަން އެއްބަސް ނުވުމެވެ. 

އެފަހުން ރައީސް ނަޝީދާއި ޞާލިޙާދެމެދު އޮތް ގުޅުން ކެނޑި ނަޝީދު އެމްޑީޕީ ރައީސް ކަމުން އިސްތިއުފާ ދެއްވައި ޕާޓީންވެސް ވަނީ ވަކިވެ ވަޑައިގެންފައެވެ. 

މީގެ އިތުރުން އެމަނިކުފާނު ތާއީދު ކުރާ ކަމަށް ވިދާޅުވެފައިވާ ޕްރިފަރެންޝިއަލް ވޯޓިންގެ ނިޒާމުގައި އެ މީހަކު ވޯޓް ދޭނީ އެންމެ ރަނގަޅު ކެންޑިޑޭޓުން ތަރުތީބުވާ ގޮތަކަށެވެ. އެންމެ ރަނގަޅު ކެންޑިޑޭޓާކައި ދެވަނައަށް ރަނގަޅު ކެންޑިޑޭޓާއި ތިންވަނައަށް ރަނގަޅު ކެންޑިޑޭޓް މިހެން ފާހަގަވާ ގޮތަށެވެ. އެ ގޮތުން އެއްވެސް ކެންޑިޑޭޓަކަށް 50 ޕަސެންޓް ނުލިބިއްޖެނަމަ ދެވަނަ އަށް އެންމެ ރަނގަޅު ކެންޑިޑޭޓަށް ރައްޔިތުން ދިން ވޯޓް ގުނާނެ އެވެ.

މި ނިޒާމު ރާއްޖެއާ އަވައްޓެރި އިންޑިއާ އަދި ލަންކާގައި ވެސް އެބަ އޮތެވެ. ނަމަވެސް ހުރިހާ އިންތިހާބެއްގައި އެ ގޮތަށް އަމަލެއް ނުކުރެ އެވެ. ލަންކާގައި އެންމެ ފަހުން އޮތް ރިޔާސީ އިންތިހާބު ގައި ވެސް ނަތީޖާ ނެރެފައިވަނީ އެއްވެސް ކެންޑިޑޭޓަކަށް 50 ޕަސެންޓް ވޯޓް ނުލިބުމުން ދެވަނަ އަށް އެންމެ ރަނގަޅު ކެންޑިޑޭޓަށް ރައްޔިތުން ދިން ވޯޓް ގުނައިގެންނެވެ.

ޕްރިފަރެންޝިއަލް ނިޒާމަކީ ރައީސް ޑރ މުޙައްމަދު މުޢިއްޒުވެސް ތާއީދު ކުރައްވާ ކަމަށް ވިދާޅުވެފައިވާ ނިޒާމެވެ.