މޯލްޑިވްސް އިންޓަނޭޝަނަލް ފައިނޭންޝަލް ސެންޓަރު (އެމް.އައި.އެފް.ސީ) އަކީ ރާއްޖޭގެ އިޤްތިޞާދުގެ ކުރިއެރުމަށާއި، ދުނިޔޭގެ މާލީ މަރުކަޒެއްގެ ގޮތުގައި ރާއްޖެ ވަރުގަދަކުރުމަށް އެޅޭ މުހިންމު ފިޔަވަޅެއް ކަމުގައި ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ. 

އެމްއައިއެފްސީ ގާއިމުކުރުމާ ގުޅޭގޮތުން ޖޮއިންޓް ވެންޗާ އެއްބަސްވުމާއި ފަހުމުނާމާގައި ސޮއިކުރުމުގެ ރަސްމިއްޔާތެއް ރޭ ކުރުނބާ މޯލްޑިވްސްގައި ވަނީ ބާއްވާފައެވެ. 

އެކަމަށްޓަކައި ރައީސުލްޖުމްހޫރިއްޔާއަށް މަރުޙަބާ ވިދާޅުވެ ޤާސިމް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މިއީ ރާއްޖޭގެ އިޤްތިޞާދު ތަނަވަސްކޮށް، ދުނިޔޭގެ މާލީ މަރުކަޒެއްގެ ގޮތުގައި ރާއްޖެ ވަރުގަދަކުރުމަށް އެޅޭ މުހިންމު ފިޔަވަޅެއް ކަމަށެވެ.

Advertisement

ޤާސިމް އިބްރާހީމް ވިދާޅުވެފައިވަނީ ފަތުރުވެރިކަމަށް ބަރޯސާވެފައިވާ ޤައުމަކަށް ދެމެހެއްޓެނިވި ބޭރުގެ އިންވެސްޓްމަންޓް ގެނައުމަކީ ވަރަށް މުހިންމު ކަމެއް ކަމަށެވެ. އަދި މިއަދުގެ ހަލުވިކޮށް ބަދަލުވަމުންދާ މާލީ ދުނިޔޭގައި، ޑިޖިޓަލް ފައިސާއާއި ބްލޮކްޗެއިން ޓެކްނޮލޮޖީ އެމް.އައި.އެފް.ސީ އާ އެއްކޮށްލުމަކީ ކޮންމެހެން ކުރަންޖެހޭ ކަމެއް ކަމަށް ވެސް އޭނާ ވިދާޅުވެފައިވެއެވެ.

"މިކަމުގެ ސަބަބުން އަޅުގަނޑުމެންގެ އިޤްތިޞާދު މުސްތަޤްބަލަށް ތައްޔާރުވެ، ފިންޓެކް އީޖާދުތައް އުފެއްދި، ޚާއްޞަކޮށް ޒުވާނުންނާއި މިހާރުގެ ވިޔަފާރިވެރިންނަށް ދުނިޔޭގައި ފުރުޞަތުތައް ހުޅުވިގެންދާނެ،" ޤާސިމް އިބްރާހީމް ވިދާޅުވިއެވެ.

ޤާސިމް އިތުރަށް ވިދާޅުވެފައިވަނީ މި ހިތްވަރުގަދަ ތަޞައްވުރު ޙަޤީޤަތަކަށް ވެގެންދާނެ ކަމުގެ ޝައްކެއް ނެތް ކަމަށެވެ. އަދި ރާއްޖެއަށް ފައިދާ ކުރާނެ ގޮތަށް އެކުލެވިގެންވާ މާލީ މަރުކަޒަކުން ޒަމާނީ މާލީ ވިޔަފާރިތަކާއި ޑިޖިޓަލް އިޤްތިޞާދު އެކުގައި ބަލައިގަންނަންޖެހޭނެ ކަމަށް ވެސް ވިދާޅުވެފައިވެއެވެ.

މިއާއެކު ޤާސިމް ވަނީ ރައީސް މުޢިއްޒުގެ މި ތަޞައްވުރަށް އެއްބާރުލުން ދެއްވުމަށް ހުރިހާ ފަރާތްތަކަށް، ޚާއްޞަކޮށް ސިޔާސީ ޕާޓީތަކާއި އެކި ފިކުރުގެ ލީޑަރުންނަށް ގޮވާލައްވާފައެވެ. އޭނާ ވިދާޅުވެފައިވާ ގޮތުގައި މިއީ ވަރުގަދަ އަދި ތަފާތު ދާއިރާތަކުން ކުރިއަރާފައިވާ ދިވެހިރާއްޖެއެއް ބިނާކުރުމަށް އެޅޭ މުހިންމު ފިޔަވަޅެކެވެ.