ވޭވަށާއި ދަރަނބޫދޫގެ ކަރަންޓްގެ ހާލަތު ރަގަޅުކުރުމުގެ ގޮތުން އެ ދެ ރަށުގައި އައު އިންޖީނު ބެހެއްޓުމުގެ މަސައްކަތް ފެނަކަ ކޯޕަރޭޝަނުން ފަށައިފިއެވެ.

ފެނަކައިން މިހާރު ވަނީ ދަރަނބޫދޫ އާއި ވޭވަށުގެ ކަރަންޓް ހާލަތު ރަނގަޅުކުރުމަށް އެ ދެރަށަށް އައު އިންޖީނުތައް ގެންގޮސްފައެވެ. މިކަމާ ގުޅޭގޮތުން ފެނަކައި އެކްސްގައި ކުރި ޕޯސްޓެއްގައި ބުނެފައިވަނީ، އެ ދެރަށަށް ގެންދިޔައީ 250 ކވ ގެ އިންޖީނުކަމަށެވެ. 

ފ.އަތޮޅު ދަރަނބޫދޫ އާއި މ އަތޮޅު ވޭވަށަކީ ކަރަންޓްގެ މައްސަލަ އަބަދުވެސް ބޮޑު ދެ ރަށްކަން ފާހަގަކޮށްލެވެއެވެ.

މިގޮތުން ފެނަކައިން ވަނީ މީގެ ދެ އަހަރުކުރިން ވޭވަށުގެ އިންޖީނުގެ ތަރައްޤީކުރުމުގެ މަސައްކަތްކޮށްފައެވެ.

މިގޮތުން ވޭވަށުގައި ކަރަންޓް ދިނުމަށް ބޭނުންކުރަމުންދިޔަ ދުވަސްވީ އިންޖީނުގޭގެ ބަދަލުގައި ފެނަކައިން ވަނީ 2022 ވަނަ އަހަރު އެރަށުގައި އައު އިންޖީނުގެއެއް އަޅައި ހިދުމަތްދޭން ފަށާފައެވެ. އޭރު އެރަށުގައި ކަރަންޓް ދިނުމަށް ބަހައްޓާފައިވަނީ، 400ކވ ގެ އިންޖީނެކެވެ. ވޭވަށު އިންޖީނުގެ ތަރައްޤީކުރުމަށް ވަނީ 10 މިލިއަން ރުފިޔާ ހޭދަކޮށްފައެވެ. 

ފަނަކައިން މިއަދު ވޭވަށަށް ފޮނުވި އައު އިންޖީނާއެކު އެރަށަށް ކަރަންޓް ދޭ ކެޕޭސިޓީ 650ކވ އަށް އިތުރު ކުރެވިގެންދާނެއެވެ.