ރާއްޖޭގައި ޤާއިމްކުރުމަށް ނިންމާފައިވާ މޯލްޑިވްސް ފައިނޭންޝަލް ސެންޓަރުގެ ބިންގާ މިއަދު އަޅައިފިއެވެ.

ފައިނޭންޝަލް ސެންޓަރުގެ ބިންގާ ރަމްޒީގޮތުން މިއަދު އެޅުމުގެ ރަސްމިއްޔާތު ކުރިއަށްގެންގޮސްފައިވަނީ މިއަދު އެކަމަށްޓަކައި ހުޅުމާލެ ފޭސް ތިނެއްގައި ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި ރަމްޒީ ބިންގާ އިފްތިތާހުކޮށްދެއްވީ، މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު، މޫސާ ޒަމީރު އަދި އެމްބީއެސް ގްލޯބަލް އިންވެސްޓްމަންޓްގެ ރައީސް، ޝެއިޚް ނާއިފް ބިން ޢީދު އަލް ޘާނީ އެވެ. މި ރަސްމިއްޔާތުގައި ޑރ. މުޙައްމަދު މުޢިއްޒާއި ސަރުކާރު ބައެއް އިސްވެރިން ބައިވެރިވެ ވަޑައިގެންނެވިއެވެ.

ދިވެހި ސަރުކާރާއި އެމްބީއެސް ގްލޯބަލް އިންވެސްޓްމަންޓްސް ގުޅިގެން 8.8 ބިލިއަން ޑޮލަރުގެ އެމް.އައި.އެފް.ސީ ޤާއިމްކުރުމާ ގުޅޭ އެއްބަސްވުމގައި ސޮއިކޮށްފައިވަނީ ރޭ ކުރުނބާ މޯލްޑިވްސްގައި ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި ވާހަކަދައްކަވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެފައިވަނީ، ފައިނޭންޝަލް ސެންޓަރު ވެގެންދާނީ، ރާއްޖެ ތަރައްގީ ވެފައިވާ ގައުމަކަށް ވުމަށް ކުރާ ދަތުރުގެ ފެށުމަށް ކަމަށެވެ. 

ފައިނޭންޝަލް ސެންޓަރުގެ ބިންގާ އެޅުމުގެ ރަސްމިއްޔާތުގެ ތެރެއިން... ފޮޓޯ: ރައީސް އޮފީސް

މާލީ ވަޒީރު މޫސާ ޒަމީރު ވިދާޅުވެފައިވަނީ މި ފައިނޭންޝަލް ސެންޓަރަކީ ވަރަށް މުހިންމު މަޝްރޫޢެއް ކަމަށާއި، މިއީ ދިވެހިންގެ އަމާޒުތަކާ އެއްގޮތަށް ފަތުރުވެރިކަމުގެ އިތުރުން އިޤްތިޞާދު ތަނަވަސްކުރުމަށް ލިބޭ ރަނގަޅު ފުރުޞަތެއް ކަމަށެވެ. މީގެ ސަބަބުން ދުނިޔޭގެ އެންމެ ރަނގަޅު ވިޔަފާރިތަކާއި އައު ޚިޔާލުތައް ގެންގުޅޭ ވިޔަފާރިވެރިން ރާއްޖެ އައުމަށް މަގުފަހިވެގެންދާނޭކަމަށް މާލީ ވަޒީރު ވިދާޅުވިއެވެ.

މާލީ ވުޒާރާއިން މިއަދު ބުނީ މި މަޝްރޫޢުގެ ސަބަބުން ދިވެހިރާއްޖެއަށް ފަތުރުވެރިކަމުގެ އިތުރުން އެހެން ދާއިރާތަކަށް އިޤްތިޞާދު ފުޅާކުރުމުގެ ފުރުޞަތު ލިބިގެންދާނޭ ކަމަށެވެ. އަދި މުސްތަޤުބަލުގެ މާލީ ދާއިރާ ޤާއިމްކޮށް، ތަފާތު ބޭނުންތަކަށް ބޭނުންކުރެވޭ ސަރަޙައްދެއްގެ ޒަރީއާއިން، އިންޑިއާ ކަނޑުގެ ސަރަޙައްދުގައި އެންމެ ފާހަގަކޮށްލެވޭ މާލީ މަރުކަޒުގެ ގޮތުގައި ދިވެހިރާއްޖެ ޤާއިމުކުރެވިގެން ދާނޭކަމަށްވެސް އެ ވުޒާރާއިން ބުނެއެވެ.

މި މަޝްރޫޢުއަށް މިހާތަނަށް 11 ފަރާތަކުން އިންވެސްޓްކުރާނޭކަމުގެ ޔަގީންކަން ލިބިފައިވާކަމަށް މާލީ ވުޒާރާއިން ބުނެއެވެ. ހުޅުމާލޭ ފޭސް ތިނެއްގައި މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރު ތަރައްޤީކުރަނީ 3،500 މީހުންގެ ޖާގަ ހިމެނޭގޮތަށެވެ.