ތިނަދޫ ސިޓީގައި ހިނގި ނުރައްކާތެރި އެކްސިޑެންޓެއްގައި އަންހެނެއްގެ ބޮލަށް ބޮޑެތި އަނިޔާތަކެއްވެ، އިތުރު ފަރުވާއަށް މާލެ ގެނެސްފިއެވެ.
ފުލުހުން މިއަދު ބުނީ، ތިނަދޫ ސިޓީގެ ކުރީގެ ހުކުރު މިސްކިތް ކައިރީ ކާރަކާއި ސައިކަލެއްޖެހި އެކްސިޑެންޓް ވެފައިވާ މައްސަލަ 2025 އޭޕްރިލް 27 ވަނަ ދުވަހުގެ 15:47 ހާއިރު ރިޕޯޓް ކޮށްފައިވާ ކަމަށެވެ.
އަދި މި އެކްސިޑެންޓުގައި ސައިކަލް ދުއްވަން އިން 31 އަހަރުގެ އަންހެން މީހާގެ ބޮލަށް ލިބުނު އަނިޔާގެ ސަބަބުން، އޭނާ އަށް ތިނަދޫ ރީޖަނަލް ހޮސްޕިޓަލްގެ އައި.ސީ.ޔޫގައި ފަރުވާ ދެވިފައިވާ ކަމަށާ އޭގެ ފަހުން، އިމަޖެންސީގައި މާލެ ގެނެސް އައި.ޖީ.އެމް.އެޗްގައި ފަރުވާ ދެމުންދާ ކަމަށް ފުލުހުން ބުންޏެވެ.
މީގެ އިތުރުން، އަނިޔާ ލިބުނު އަންހެން މީހާގެ ހާލަތު ރަނގަޅުވަމުން އަންނަ ކަމަށް ޢާއިލާއާ ހަވާލާދީ ފުލުހުން ބުނެފައިވެއެވެ.
މި އެކްސިޑެންޓްގައި ހިމެނޭ ކާރު ދުއްވި މީހާ ފުލުހަށް ހާޒިރުކޮށް ތަޙްޤީޤުގައި ސުވާލުކޮށްފައިވާ ކަމަށާ ފުލުހުން މި މައްސަލަ ތަޙްޤީޤު ކުރަމުންދާ ކަމަށް ފުލުހުން ބުންޏެވެ.
Advertisement
This content is created and paid for by advertisers and does not involve Voice Journalists
