ޖަޕާނު ސަރުކާރުން އެމްއެންޑީއެފްގެ ކޯސްޓްގާޑަށް ދެ އުޅަނދު ހަދިޔާކުރަން ނިންމައި، އެކަމުގެ އެއްބަސްވުމުގައި މިއަދު ސޮއިކޮށްފި އެވެ.

މިއަދު މިިނިސްޓްރީ އޮފް ފޮރިން އެފެއާޒްގައި ބޭއްވުނު ރަސްމިއްޔާތެއްގައި، މި އެއްބަސްވުމުގައި ސޮއިކުރެއްވީ ރާއްޖެއަށް ކަނޑައަޅުއްވާފައިވާ ޖަޕާނުގެ ސަފީރު އިޝިގާމީ ރުމިކޯ އާއި ރާއްޖޭގެ ފޮރިން މިނިސްޓަރު ޑރ. އަބްދުالله ޚަލީލެވެ.

ޖަޕާން އެމްބަސީން މަޢުލޫމާތު ދިން ގޮތުގައި، މި އެއްބަސްވުމުގެ ދަށުން ޖަޕާނު ސަރުކާރުން 400 މިލިއަން ޖަޕާނީސް ޔެން (ގާތްގަނޑަކަށް 2.8 މިލިއަން އެމެރިކާ ޑޮލަރު) ގެ ހިލޭ އެހީއެއް ދިވެހި ސިފައިންގެ ކޯސްޓްގާޑަށް ދޭގޮތަށް ވަނީ ނިންމާފައެވެ. މި އެހީގެ ދަށުން ހަދިޔާކުރަން ނިންމާފައިވާ "ހާބަ ކްރާފްޓް ޕެޓްރޯލް ވެސަލް"ގެ ދެ އުޅަނދެވެ.

މި އުޅަނދުތަކުގެ ސަބަބުން ކަނޑުމަތީގެ ސަލާމަތާއި ރައްކާތެރިކަން އިތުރުވެ، ތިމާވެށި ހިމާޔަތްކުރުމާއި ކަނޑުމަތީގައި ޤާނޫނު ތަންފީޒުކުރުން ހަރުދަނާވެގެންދާނެ ކަމަށް ޖަޕާނުން ބުނެފައިވެއެވެ. އެގޮތުން، މި އުޅަނދުތަކުން މަސްތުވާތަކެތި އެތެރެކުރުމާއި، މީހުން ޓްރެފިކްކުރުމާއި، ނުވަތަ ޤާނޫނާ ޚިލާފަށް މަސްވެރިކަން ކުރުން ފަދަ ކަންކަން ހުއްޓުވުމަށް ޕެޓްރޯލްކޮށް، ކަނޑުމަތީގެ ޤާނޫނުތައް ތަންފީޒުކުރުމަށް އެހީވެދޭނެކަން ފާހަގަކޮށްފައިވެއެވެ. 

މީގެ އިތުރުން، މި އުޅަނދުތަކަކީ ކަނޑުމަތީގައި ހިނގާ ކުއްލި ހާދިސާތަކުގައި އަވަހަށް އެހީތެރިކަން ފޯރުކޮށްދިނުމަށް ބޭނުންކުރެވޭނެ އުޅަނދުތަކަކަށް ވާއިރު، ކަނޑުގެ ދިރުންތައް ރައްކާތެރިކުރުމަށްޓަކައި ޤާނޫނާ ޚިލާފަށް މަސްވެރިކަން ކުރާ ފަރާތްތައް ހޯދައި، އެކަން ހުއްޓުވުމަށްވެސް މި އުޅަނދުތައް ބޭނުންކުރެވޭނެ ކަމަށް ޖަޕާނުން ބުނެފައިވެއެވެ. 

މީގެކުރިން ވެސް ޖަޕާނުން ވަނީ އެމްއެންޑީއެފްގެ ކޯސްޓްގާޑަށް އުޅަނދެއް ހަދިޔާކޮށްފަ އެވެ. އަދި އެމްއެންޑީއެފްގެ ފަޔާ އެންޑް ރެސްކިއު ސާވިސްއަށް ވެސް ޖަޕާނުން ކުރިން ވެހިކަލްތަކެއް ހަދިޔާކުރި އެވެ.