މަސައްކަތުގެ މައިދާނަށް ޒުވާނުން ފައްކާކުރުމުގެ ގޮތުން އެމްޓީސީސީން ކުރިއަށްގެންދާ ހުނަވަރު ޕްރޮގްރާމުގައި ބައިވެރިވުމުގެ ފުރުސަތު އެކުންފުނިން މިއަދު ހުޅުވާލައިފިއެވެ.

އެމްޓީސީސީން މިއަދު ބުނީ، ހުނަވަރު ޕްރޮގާރާމްގެ ދަށުން ކޮންސްޓްރަކްޝަން އެންޑް ޑްރެޖިން ޑިވިޜަންގައި، ޕްރޮޖެކްޓް އޮފިސަރުންގެ ގޮތުގައި މަސައްކަތްކުރުމަށް ބޭނުންވާ ފަރާތްތަކަށް އެފުރުސަތު މިހާރު ހުޅުވާލާފައިވާކަމަށެވެ. އެމްޓީސީސީން ވަނީ، މިފަހަރުގެ ޕްރޮގްރާމަށް 11 ފަރާތެއް ނެގުމަށް ނިންމާފައެވެ. 

ޖުމްލަ 3 މަސްދުވަހުގެ މުއްދަތަކަށް ކުރިއަށްގެންދާ މި ޕްރޮގްރާމުގައި މަސައްކަތްކުރަންޖެހޭނީ ހަފްތާއަކު 6 ދުވަހު – ދުވާލަކު 08 ގަޑި އިރުއެވެ. އެލަވަންސްގެ ގޮތުގައި ކަނޑައަޅާފައިވަނީ 5،000 ރުފިޔާއެވެ. ޕްރޮގްރާމުގައި ބައިވެރިވާ ފަރާތްތަކުގެ ހުރުން ލާޒިމްވާ ޝަރުތުތަކުގެ ތެރޭގައި ސައިންސް ސްޓްރީމުން އޯލެވެލް ފުރިހަމަ ކޮށްފައިވުމާއި، މަސައްކަތަށް ޝައުގުވެރިކަން ހުރުމާއި، ދާއިރާގެ އައު ހުނަރު ދަސްކުރުމަށް ޝައުގުވެރިކަން ހުރުން ހިމެނެއެވެ.

Advertisement

އެމްޓީސީސީން ބުނީ ޕްރޮގްރާމުގައި ބައިވެރިވުމަށް ޝައުޤުވެރިވާ ފަރާތްތަކުން އެކުންފުނީގެ އޮންލައިން ޖޮބް އެޕްލިކޭޝަން ފުރިހަމަ ކުރުމަށްފަހު މިހިނގާ މެއިމަހުގެ 14 ވަނަ ދުވަސް ނިމުމުގެ ކުރިން ހުށަހަޅަން ޖެހޭނޭ ކަމަށެވެ. މަޤާމުތަކަށް ޝޯޓްލިސްޓްކުރެވޭ ފަރާތްތަކަށް އިންޓަރވިއު ކުރުން ކުރިއަށްދާނީ މެއިމަހުގެ 15 ވަނަ ދުވަހުން ފެށިގެން ޖޫންމަހުގެ 15 ވަނަ ދުވަހާ ހަމަޔަށްކަމަށްވެސް އެމްޓީސީސީން ބުނެއެވެ.

އެމްޓީސީސީން ވަނީ މީގެ ކުރިންވެސް ހުނަވަރު ޕްރޮގްރާމް މިދިޔަ އަހަރުތަކުގައި ކުރިއަށް ގެންގޮސްފައެވެ. އެގޮތުން މި ޕްރޮގްރާމުން ތަމްރީނުވި ދަރިވަރުން އެމްޓީސީސީގެ ޒިންމާދާރު މަޤާމުތަކުގައި މިއަދު ހަރަކާތްތެރިވަމުން އަންނަކަން އެކުންފުނިން ފާހަގަކުރެއެވެ.