ކުރީގެ އިމިގްރޭޝަން ކޮންޓްރޯލަރ މުހައްމަދު ޝަމްއާން ވަހީދު ބަންދުގައި ބެހެއްޓުމަށް ކުރިމިނަލް ކޯޓުން ކޮށްފައިވާ އަމުރުގެ މައްސަލަ ސުޕްރީމް ކޯޓުން ބަލައިނުގަންނަން ނިންމައިފި އެވެ.

ކޮރަޕްޝަންގެ ތުހުމަތުކޮށް މޯލްޑިވްސް އިމިގްރޭޝަންގެ ކޮންޓްރޯލަރުކަމުން ވަކިކުރި މުހައްމަދު ޝަމްއާން ވަހީދު ހައްޔަރުކޮށް، އޭނާގެ ބަންދުކުރި މައްސަލައިގައި އޭނާގެ ފަރާތުން އެ މައްސަލަ ހައިކޯޓަށް ހުށަހެޅި އެވެ. އެ ކޯޓުން އިސްތިއުނާފް ބަލައިގަނެފައިވަނީ މިދިޔަ އޭޕްރިލްމަހުގެ 9 ވަނަ ދުވަހު އެވެ. 

އިސްތިއުނާފްގެ މައްސަލަ ބެލުމަށް ފަހު އެ ކޯޓުގެ 3 ފަނޑިޔާރުންގެ އިއްތިފާގުން ނިންމާފައިވަނީ، ޝައްމާނުގެ ބަންދަށްޖެހި 15 ދުވަހާއި، ޝަރީއަތް ނިމެންދެން ބަންދުކުރުމަށް ނެރުނު އަމުރުވެސް ރަނގަޅު ކަމަށެވެ. 

ހައިކޯޓަށް ހުށަހެޅި އިސްތިއުނާފުގެ މި މައްސަލާގައި ޝަމްއާންގެ މައްޗަށް ހިންގާ ތަހުގީގުގައި އޭސީސީގެ ދައުރެއް ނެތުމާއި އެ މައްސަލަ ފުލުހުންގެ މުއައްސަސާއިން އެކަނި ތަހުގީގު ކުރުމަކީ ޖިނާއީ އިޖުރާތާ ހިލާފު ކަމެއްކަން ފާހަގަކޮށް އެ މައްސަލަ ބަލައި ބަންދުގެ މުއްދަތު ރިވިއު މުރާޖައާކުރުމަށް އޭނާ ވަނީ އެދިފައެވެ. ނަމަވެސް ހައިކޯޓުން ވަނީ އެކަމަކީ ގާނޫނާ ހިލާފްކަމެއް ނޫން ކަމަށް ފާހަގަކޮށްފައެވެ. އެގޮތުން ފުލުހުންނަށް ތަހްގީގް ކުރެވޭނޭ ކަމަށް ހައިކޯޓުގެ ހުކުމްގައި ވަނީ ބުނެފައެވެ.

ހައިކޯޓްގެ އެ ނިންމުން ޝަމްއާންގެ ފަރާތުން ވަނީ ސުޕްރީމް ކޯޓަށް ހުށައަޅާފަ އެވެ. ނަމަވެސް ކޯޓުން ނިންމީ އެ މައްސަލަ ބަލައިނުގަތުމަށެވެ.

ހައިކޯޓުން ވެސް ފުރަތަމަ ނިންމީ މައްސަލަ ބަލައިނުގަންނާށެވެ. 

ބިދޭސީން އަތުން ނާޖައިޒު މަންފާ ހޯދުމުގެ ތުހުމަތުގައި ޝަމްއާން ހައްޔަރު ކުރީގެ މާރިޗު މަހުގެ 21 ވަނަ ދުވަހުގެ ރޭގެ ވަގުތެއްގަ އެވެ. ޝަމްއާންގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން 15 ދުވަހުގެ ބަންދުގެ މުއްދަތެއް ޖަހާފައިވަނީ ހުސްވި މާޗްމަހުގެ 22 ވަނަ ދުވަހުއެވެ. 

ޝައްމާންގެ މައްސަލާގައި ފުލުހުން ވަނީ އޭނާ ދިރިއުޅުނު އެޕާޓްމަންޓުވެސް ބަލާފާސްކޮށްފައެވެ. އެގޮތުން އޭނާ ދިރިއުޅުނު ތަނުން 257،475 ރުފިޔާ އާއި 10،000 ޑޮލަރު ފެނުނު ކަމަަށް ފުލުހުން ވަނީ ބުނެފައެވެ.