އުއްތަމަ ފަނޑިޔާރު, މުއުތަސިމް އަދުނާނު މަގާމުން ވަކިވެވަޑައިގަންނަވާން ތައްޔާރުވެވަޑައިގަންނަވާ ކަމުގެ އިޝާރާތެއް ދެއްވާފައި ވަނިކޮށް އެ މަގާމުން ޝަރަފުވެރިކަމާއެކު ވަަކިވެވަޑައިގަތުމަށް ހުށައަޅުއްވައިފި އެވެ.
އުއްތަމަފަނޑިޔާރު އެ ހުށައެޅުއްވުން ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށައަޅުއްވާފައިވާކަން ޖުޑީޝަރީގެ އޮފިޝަލަކު ވަނީ ޔަގީން ކޮށް ދެއްވާފަ އެވެ. މުއުތަސިމްގެ އެ ހުށައެޅުއްވުމާމެދު ޖޭއެސްސީން ވަރަށް އަވަހަށް ގޮތް ނިންމާނެ އެވެ.
ފަނޑިޔާރުގެ މަގާމުން ޝަރަފުވެރިކަމާއެކު ވަކިވެވަޑައިގެންނެވޭނީ އެ ފުރުސަތު ދިނުމަށް ޖޭއެސްސީން ނިންމައިފި ނަމަ އެވެ. މީގެ ކުރީން ބައެއް ފަނޑިޔާރުންނަށް އެ ފުރުސަތު ދީފައެއް ނުވެ އެވެ.
އުއްތަމަ ފަނޑިޔާރު, މުއުތަސިމް އަދުނާނު މަގާމުން ވަކިވެވަޑައިގަންނަވާނެ ކަމުގެ އިޝާރާތެއް ފެބްރުއަރީ 17 ވަނަ ދުވަހު ވަނީ ދެއްވާފަ އެެވެ. ވަކީލުން ހުވާކުރުމަށް އެ ދުވަހު އޮތް ރަސްމިއްޔާތެއްގައި މުއުތަސިމް ވިދާޅުވީ މިހާރު "ދުވަސް" ވެއްޖެ ކަމަށެވެ.
އަދި މަގާމުގައި ދެން މާގިނަ ދުވަހު ދެމި ނުހުންނަވާނެ ކަމަށް އިޝާރާތަކަށް ފުދޭ ފަދަ މޭރުމަކުން ވިދާޅުވީ އެފަދަ ރަސްމިއްޔާތަކުން މިހާރު ހުންނެވި ހައިސިއްޔަތުން ދެން ފެނިވަޑައިނުގެންފާނެ ކަމަށެވެ.
ސުޕްރީމް ކޯޓަށް އަނެއްކާ ބަދަލުވަނީ
ސުޕްރީމް ކޯޓްގެ ފަނޑިޔާރުންނަށް އަވަސް ބަދަލުތަކެއް އަންނަތާ އަހަރުތަކެއް ވެއްޖެ އެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި ސުޕްރީމް ކޯޓްގެ ގިނަ ފަނޑިޔާރުންތަކެއް މަގާމުން ވަކިކުރެއްވި އެވެ. ބައެެއް ފަނޑިޔާރުންނަށް ބޮޑެތި ތުހުމަތުތައް ކުރެވި ޖަލުގައި ބަންދު ކުރެއްވި އެވެ.
ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގެން މުޅި ސުޕްރީމް ކޯޓް އެއްކޮށް ބަދަލު ކުރެއްވި އެވެ.
މިހާރު ހިނގަމުންދާ ރައީސް މުއިއްޒުގެ ވެރިކަމުގައި ވެސް ސުޕްރީމް ކޯޓް ބަދަލުވުމުގެ މަރުހަލާ އެބަ ހިނގަ އެވެ. މިހާރުވެސް އެ ކޯޓްގެ އެއް ފަނޑިޔާރަކު އިސްތިއުފާ ދެއްވި އެވެ. ފަނޑިޔާރު ހުސްނުއް ސުއޫދު އިސްތިއުފާ ދެއްވީ އޭނާއާ ގުޅޭ މައްސަލައެއް ބަލަން ފެށުމުންނެވެ.
ސުޕްރީމް ކޯޓްގެ ދެ ފަނޑިޔާރުން ކަަަމަށްވާ ޑރ. އަޒްމިރަލްދާ ޒާހިރު އާއި މަހާޒް އަލީ ޒާހިރު މަގާމުން ވަކިކުރުމަށް ނިންމާ ޖޭއެސްސީން މަޖިލީހަށް ވަނީ މައްސަލަ ފޮނުވާފަ އެވެ. ވަރަށް އަވަހަށް އެ ދެ ފަނޑިޔާރުން މަގާމުން ވަކި ކުރާނެ ކަމަށް ބެލެވެ އެވެ.
އުއްތަމަ ފަނޑިޔާރު މުއުތަސިމް މަގާމުން ވަކިވެވަޑައިގަތުމުން ދެން ތިއްބަވާނީ ދެ ފަނޑިޔާރުންނެވެ.
Advertisement
This content is created and paid for by advertisers and does not involve Voice Journalists
