ގޭބިސީތަކާއި ވިޔަފާރިތަކުގެ ފެން ބިލަށް އަރާފައިވާ ޖޫރިމަނާ ފައިސާ މައާފްކޮށްދިނުމުގެ ޕްރޮގްރާމެއް ޤައުމީ ފެންކުންފުނިން ފަށައިފިއެވެ.

މިކަމާ ގުޅޭގޮތުން އެމްޑަބްލިއުއެސްސީން ބުނީ، ބިލްތަކަށް ފައިސާ ދެއްކުމަށް ލުއިފަސޭހަ މަގެއް ފަހިކޮށްދިނުމަށް ކުރަމުންދާ މަސައްކަތްތަކުގެ ތެރެއިން، ގޭބިސީތަކާއި ވިޔަފާރިތަކުގެ ފެން ބިލް ނުދެއްކި ގިނަދުވަސް ވެގެން އަރާފައިވާ ޖޫރިމަނާ ފައިސާ މަޢާފުކޮށްދެއްވުމުގެ އިތުރު ޕްރޮގްރާމެއް ކުރިއަށް ގެންދިއުމަށް ނިންމާފައިވާކަމަށެވެ. 

ފެން ކުންފުނިން ބުނީ މި ޕްރޮގްރާމުގެ ދަށުން އެމް.ޑަބްލިޔު.އެސް.ސީގެ ޑޮމެސްޓިކް ކަސްޓަމަރުންނާއި ކޮމާޝަލް ޓެރިފް ކަސްޓަމަރުންގެ ބިލްތަކަށް، މިދިޔަ އަހަރުގެ ޑިސެމްބަރުމަހުގެ 31 ވަނަ ދުވަހުގެ ނިޔަލަށް އަރާފައިވާ ޖޫރިމަނާ މަޢާފްކޮށްދެވޭނެއެވެ. ޖޫރިމަނާ މަޢާފްކޮށްދެވޭނީ އެ މުއްދަތާ ހަމަޔަށް ޖޫރިމަނާ ނިސްބަތްވާ ބިލްތަކަށް ދައްކަވަންޖެހޭ ޖުމްލަ ފައިސާ މިހިނގާ މެއިމަހުން ފެށިގެން މިއަހަރުގެ ޑިސެމްބަރުމަހުގެ 31 ގެ ނިޔަލަށް އެއްކޮށް ބިލްތައް ދައްކައި ޚަލާސްކުރާ ކަސްޓަމަރުންނަށްކަމަށް ފެންކުންފުނިން ބުނެއެވެ.

އެމްޑަބްލިއުއެސްސީން ބުނީ އްބަސްވުމެއްގެ ދަށުން އެ ބިލްތަކަށް މަހުން މަހަށް ބަހާލައިގެން ފައިސާ ދައްކަވައި ޚަލާސްކުރެއްވުމަށް އެދިވަޑައިގަންނަވާ ކަސްޓަމަރުންނަށް، އެ އިންތިޒާމް ހަމަޖައްސައިދޭނޭ ކަމަށެވެ. މަހުން މަހަށް ބަހާލައިގެން ފައިސާ ދައްކަވާ ކަސްޓަމަރުންނަށް ޖޫރިމަނާ މަޢާފްކޮށްދެވޭނީ އެއްބަސްވުމާއި އެއްގޮތަށް ފައިސާ ދައްކައި ނިމުމުންކަމަށްވެސް ފެންކުންފުނިން ބުނެއެވެ.

މިކަމާ ގުޅޭގޮތުން އިތުރު މައުލޫމާތު ބޭނުންވާ ކަސްޓަމަރުން އެމްޑަބްލިއުއެސްސީގެ ކަސްޓަމަރ ކެއަރ ސެންޓަރުގެ ހޮޓްލައިން 105 އަށް ގުޅުމުން ނުވަތަ 1050 އަށް އެސް.އެމް.އެސްއެއް ފޮނުއްވުމުން ނުވަތަ [email protected] އަށް އީ-މެއިލްކުރުުމުން މައުލޫމާތު ލިބޭނޭކަމަށް އެކުންފުނިން ބުނެއެވެ.