ޕާކިސްތާންގެ އެކި ސަރަހައްދުތަކުގައި ކިޔަވަމުންގެންދާ ދިވެހި ދަރިވަރުންގެ ހާލު ފޮރިން މިނިސްޓްރީ އާއި ޕާކިސްތާނުގައި ހުންނަ ދިވެހިރާއްޖޭގެ ހައިކޮމިޝަނުން ދަނީ ވަރަށް ގާތުން ބަލަމުން ކަމަށް ބުނެފި އެވެ.

ޕާކިސްތާނާއި އިންޑިއާ އިން ނުރައްކާތެރި ހަނގުރާމައެއް ފަށާފާނެ ހާލަތަށް ގޮސްފައިވާ މި ދަނޑިވަޅުގައި ފޮރިން މިނިސްޓްރީން މިރޭ ނެރުނު ބަޔާނެއްގައި ބުނެފައި ވަނީ  ޕާކިސްތާނުގައި މިވަގުތު ތިބި ދިވެހި ރައްޔިތުންގެ ރައްކާތެރިކަން ކަށަވަރު ކުރުމަށްޓަކައި، މިނިސްޓްރީން ކުރަންޖެހޭ އެންމެހައި މަސައްކަތްތައް ގެންދަނީ ކުރަމުން ކަމަށެވެ.

މިގޮތުން، ޕާކިސްތާނުގެ މަސްރަހު މިހާރަށް ވުރެން ގޯސްވާނަމަ، އެ ގައުމުގައި ތިބި ދިވެހި ރައްޔިތުންނަށް އެހީތެރިކަން ފޯރުކޮށްދޭނެކަމުގެ ޔަގީންކަން ދީފައިވެ އެވެ.

ޕާކިސްތާނުގައި ކިޔަވާ މަރުކަޒުތަކާއި އޮފީސްތައް، އާންމު ހާލަތުގައި މިވަގުތު މަސައްކަތް ކުރަމުންދާ ކަމަށް އެ ގައުމުގެ ކަމާބެހޭ އިދާރާތަކުން، ޕާކިސްތާނުގައި ހުންނަ ދިވެހިރާއްޖޭގެ ހައިކޮމިޝަނަށް މައުލޫމާތު ދީފައިވާ ކަމަށް ވެސް ފޮރިން މިނިސްޓްރީން ބުންޏެވެ.

އަދި މި ދަނޑިވަޅުގައި، ޕާކިސްތާނުގައި ދިރިއުޅޭ ދިވެހީންނާއި އެ ގައުމަށް ދަތުރުކުރާ އެންމެހައި ދިވެހި ރައްޔިތުންގެ ސަލާމަތާއި ރައްކާތެރިކަމަށް ހާއްސަ އަހައްމިއްޔަތުކަމެއްދީ ޕާކިސްތާނުގެ ސަރުކާރާއި އެ ގައުމުގައި ހުންނަ ދިވެހިރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށް ވެސް ވަނީ އިލްތިމާސް ކޮށްފަ އެވެ.

އެ މިނިސްޓްރީން ވަނީ ޕާކިސްތާނުގައި ދިރިއުޅޭ ދިވެހިރައްޔިތަކަށް ދިމާވާ ކަންކަމުގައި ހައިކޮމިޝަނަށް ނުވަތަ މިނިސްޓްރީގެ ހޮޓްލައިނަށް ގުޅުއްވުމަށް އެދިފަ އެވެ.

* ދިވެހި ހައިކޮމިޝަނަށް ގުޅޭނެ ނަންބަރު: 923008504143‬‬‬‬‬‬‬‬

* މިނިސްޓްރީގެ ހޮޓްލައިން ނަންބަރު: 7983400

އިންޑިއާ-ޕާކިސްތާނުގެ ގުޅުން މި ފަހަރު ހީނަރުވެ ހަނގުރާމައެއް ފެށުމުގެ ހާލަތަށް ދިޔައީ މިދިޔަ މަހުގެ ފަހު ހަފްތާގައި ކަޝްމީރުގެ އިންޑިއާ ފަޅީގެ ޕަހަލްގަމްގައި ދިން ޓެރަރިސްޓް ހަމަލާތަކަކާއި ގުޅިގެންނެވެ. އިންޑިއާ ބަޔަކު ހިމެނޭހެން 27 މީހަކު މަރުވި މި ހަމަލާތަކުގެ ޒިންމާ އިންޑިއާ އިން ވަނީ ޕާކިސްތާނުގެ ބޮލުގައި އަޅުވާފަ އެވެ.

މި ހަމަލާއާ ގުޅިގެން އިސްވެ އިންޑިއާ އިން ވަނީ ޕާކިސްތާނަށް ހަމަލާ ދީފަ އެވެ. އެ ހަަމަލާތަކުގައި ޕާކިސްތާނުގެ އާންމުންތަކެއް މަރުވި އެވެ. އެހެން ކަމުން ބަދަލު ހިފުމުގެ ހަމަލާތަކެއް ޕާކިސްތާނުން ވެސް ވަނީ ދީފަ އެވެ. އެ ހަމަލާތަކުގައި އިންޑިއާގެ ބަޔަކު މަރުވި އެވެ. އަދި އިންޑިއާގެ އަސްކަރީ ބައެއް އުޅަނދުތަކަށް ހަމަލާދީ ވައްޓާލި އެވެ.

ޕާކިސްތާނުން ބުނީ އިންޑިއާގެ ހަމަލާތަކުގައި ޕާކިސްތާނުގެ އާންމުންގެ 31 މީހަކު މަރުވެފައިވާ ކަމަށެވެ.

އަދި އިންޑިއާއިން ބުނާ ގޮތުން ޕާކިސްތާނުގެ ހަމަލާތަކުގައި އިންޑިއާގެ 13 މީހުން މަރުވެފައިވެ އެވެ. އޭގެ ތެރޭގައި ސިފައިންގެ މީހަކު ވެސް ހިމެނެ އެވެ.

ހަމަނުޖެހުންތައް އަވަހަށް ހުއްޓާލާ ދެ ގައުމު ސުލްހަވުމަށް ދުނިޔޭގެ ބޮޑެތި ގައުމުތަކުން ދަނީ ގޮވާލަމުންނެވެ. ހަތިޔާރުގެ މުއްސަދިކަން އޮތް ދުނިޔޭގެ މި ބާރު ހަނގުރާމައަކަށް ދިއުމަކީ ހުރިހާ ގައުމަކަށް އަސަރު ކުރާނެ ކަމެކެވެ.