ޒުވާން ހަތީބުން ތަމްރީނުކުރުމުގެ ތިންވަނަ ބުރަށް ކުރިމަތި ލުމުގެ ފުރުސަތު މާދާމާ ހަމަވާއިރު މިހާތަނަށް 283 ޒުވާނުން ކުރިމަތިލާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު އެކަން ހާމަ ކުރެއްވީ މިއަދު އެކްސްގައި ކުރެއްވި ޕޯސްޓެއްގަ އެވެ.

އިސްލާމިކް މިނިސްޓްރީން ބުނީ މި ތަމްރީނުގައި ބައިވެރިވެވޭނީ ގުރޭޑު 10،11،12 ގައި ކިޔަވާ ނުވަތަ ކިޔެވުން ނިމި 18 އަހަރު ފުރިފައިނުވާ ކުދީންނަށް ކަމަށެވެ. މި ތަމްރީނުގައި ބައިވެރިވުމަށް ދިވެހި ރައްޔިތެއްކަން އަންގައިދޭ ކާޑުގެ ކޮޕީ އާއި ތައުލީމީ ސެޓްފިކެޓުތަކުގެ ކޮޕީ އާއި ސްކޫލުގައި އުޅޭ ނަމަ ސްކޫލުގައި އުޅޭކަމުގެ ލިޔުން އަދި 18 އަހަރު ނުފުރޭނަމަ ބެލެނިވެރިޔާގެ އިއުތިރާޒެއް ނެތްކަން އަންގައިދޭ ލިޔުމެއް ހުށައަޅަން ޖެހެ އެވެ.

Advertisement

މި ތަމްރީނު ފުރިހަމަކޮށް ހަތީބުކަމުގެ ސަނަދު ދޫކުރާނީ އިންޓަވިއު ނިންމާ، ޓްރެއިނިން ސެޝަންތަކުގެ ހުރިހާ ސެޝަންއަކަށް ހާޒިރުވެ ލިޔުމުގެ އިމްތިހާނުން ވެސް ފާސްވާ ބައިވެރިންނަށް ކަމަށް މިނިސްޓްރީން ބުނެ އެވެ.

މާލޭގައި ދިރިއުޅޭ ދަރިވަރުންނަށް ފޭސްޓު-ފޭސްކޮށް ސެޝަންތައް ކުރިއަށް ގެންދިއުމަށް ހަމަޖެހިފައިވާއިރު ރަށްރަށުގައި އަދި ރާއްޖެއިން ބޭރުގައި އުޅޭ ދަރިވަރުންގެ ސެޝަންތައް އޮންނާނީ އޮންލައިންކޮންނެވެ.

ޒުވާން ހަތީބުން ތަމްރީނުކުރުމުގެ ފުރަމަ ބުރުގައި 250 ޒުވާން ހަތީބުން ވަނީ ތަމްރީން ކޮށްފަ އެވެ. މިނިސްޓަރު ވިދާޅުވި ގޮތުގައި އަމާޒަކީ ރައީސް ޑރ މުއިއްޒުގެ މި ދައުރުގައި 1000 ޒުވާން ހަތީބުން ތަަމްރީން ކުރުމެވެ.